Surxondaryoda kam ta'minlanganlar uchun qurilayotgan uylardan olib berishini aytib fuqarolarning pulini o‘zlashtirgan ayol ushlandi

Termiz shahrida kam ta'minlanganlar uchun qurilayotgan uylardan olib berishini aytib, fuqarolarning pulini o‘zlashtirgan ayol yana bir jabrlanuvchidan pul olayotganda qo‘lga olingan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 12 oktyabr kuni Termiz shahar Bog‘zor mahallasida yashovchi I.S. viloyat IIBga ariza bilan murojaat qilgan. U murojaatida Termiz shahrining Eski shahar mahallasida yashovchi R.Sh. shahar hududida kam ta'minlangan oilalar uchun qurilayotgan uylardan xonadon sotib olishda yordam berishini aytib undan 1 000 AQSh dollari talab qilayotganini bildirgan.

Ushbu ariza yuzasidan 13 oktyabr kuni viloyat IIB xavfsiz turizmni ta'minlash hamda jinoyat qidiruv boshqarmasi xodimlari hamkorligida tezkor tadbir o‘tkazilgan. Tadbirda R.Sh. I.S.dan talab qilgan 1 000 dollardan 600 dollar va 2 million 130 ming so‘m pullarini olgan vaqtida ushlangan. Undan ashyoviy dalil hujjatlashtirib olingan.

Dastlabki surishtiruvlar davomida R.Sh. yana 4 nafar fuqarodan jami 4 million 247 ming so‘m va 4 500 dollar pullarni olgani aniqlangan.

Qayd etilishicha, joriy yil 13 oktyabr kuni R.Sh.ga nisbatan Jinoyat kodeksining 168-moddasi 3-qismi «b» bandi bilan jinoyat ishi qo‘zg‘atilgan.