Toshkent shahrida “Xavfsiz poytaxt” konsepsiyasi asosida o‘tkazilgan tungi reyd davomida Gentra haydovchici inspektorning to‘xtash ishorasiga bo‘ysunmay, qochib ketishga uringan. Ushbu voqea aks etgan videoda avtomobil majburiy tartibda to‘xtatilgandan keyin ham ruldagi ayol YPX xodimlarining qonuniy talabini bajarishdan bosh tortgani, natijada voqea joyiga yordamchi kuchlar chaqirtirilgani tasvirlangan.
UzReport telekanalining “No Comment” dasturida e’lon qilingan videotasvirlarda Gentra majburiy to‘xtatilgandan so‘ng haydovchi mashinasi jarima maydoniga joylashtirilishiga faol qarshilik qilgani, ayolga hamrohlik qilib kelayotgan opasi va qarindoshlik aloqalari ochiqlanmagan erkak jarayonga aralashgani, ikki ayol ko‘chani boshiga ko‘tarib, baqir-chaqir qilganini ko‘rish mumkin. Shuningdek, dastur davomida haydovchining yonida o‘tirgan erkak mashinadan tushib, jarayonni tasvirga olayotgan operatorning faoliyatiga qarshilik qilmoqchi bo‘lganida, ichki ishlar xodimlari uni to‘xtatib qolgani ham ko‘rinadi.
Bundan tashqari, reyd davomida haydovchi va uning hamrohlari chaqiruvlariga binoan fuqaro kiyimidagi noma’lum erkaklar kelib, YPX xodimlari bilan muzokara qilishga, qandaydir hujjatlarini pesh qilib, haydovchiga chora ko‘rmaslik, majburan to‘xtatilgan avtomobilni jarima maydoniga joylashtirmaslikni so‘ragan. Videoda ichki ishlar xodimlarining qonuniy faoliyatiga to‘sqinlik qilgan ushbu shaxslar maxsus xizmat xodimlari tomonidan olib ketilganini ko‘rish mumkin.
Haydovchi ayol va uning opasi YPX xodimlarining hech bir talabiga itoat qilmagach, uzoq muzokaralardan so‘ng ular shu hududga mas’ul profilaktika inspektorining xizmat xonasiga borgan, biroq u yerda ham ish “pishmagach”, tuman ichki ishlar bo‘limiga olib ketilgan. Videoda butun idorani boshlariga ko‘targan ayollarning spirtli ichimlik ta’sirida yoki hushyor holda bo‘lganiga aniqlik kiritilmagan.
