«Bu hech narsani o‘zgartirmaydi». Putin Ukrainaga Amerika artilleriyasi yetkazilishiga munosabat bildirib, yangi zarbalar bilan tahdid qildi

Amerikaning HIMARS baravar o‘t ochish reaktiv tizimlari Ukrainaga yetkazib berilishi hech narsani o‘zgartirmaydi, chunki ularda shundoq ham bu qurollarga muqobil bo‘lgan sovetlar davriga mansub va Rossiyada ishlab chiqarilgan «Grad», «Smerch», «Uragan» tizimlari mavjud. Bu haqda Rossiya prezidenti Vladimir Putin «Rossiya 1» telekanaliga bergan intervyusida aytib o‘tdi.

U «masofa tizimning o‘ziga emas, qo‘llanadigan raketaga bog‘liq» ekanini aytib, agar Ukraina uzoq masofaga harakatlanuvchi raketalar olsa, Rossiya «hozircha hujum qilinmagan obektlarga zarba bera boshlashi» bilan tahdid qildi. Putin aynan qanday obektlarni nazarda tutganiga aniqlik kiritmagan, ammo Rossiya hukumati avvalroq bir necha bor Kiyevdagi «qaror qabul qilish markazlari» bo‘ylab zarbalar berish haqida ogohlantirgandi.

«Bu amerikaliklar qanday raketalar yetkazib berishiga bog‘liq. Lekin biz bugun eshitayotganimiz va tushunayotganimizga ko‘ra, bu 45-70 km masofaga ucha oluvchi raketalardir. Bunday raketalar men yuqorida aytgan «Grad», «Uragan», «Smerch»larda ham bo‘lgan. Ularda ham 40-70 km masofa. Hech qanday yangi narsa yo‘q.

Qo‘shimcha qurol-yarog‘lar yetkazib berish atrofidagi gap-so‘zlardan, fikrimcha, faqat bir maqsad ko‘zlangan — imkon qadar qurolli mojaroni cho‘zish. Agar uzoqni mo‘ljalga oluvchi raketalar yetkazib berila boshlasa, biz kerakli xulosani chiqaramiz va o‘zimizning yo‘q qiluvchi vositalarimizni ishga solamiz, hozircha hujum qilmayotgan obektlarga zarba berish uchun ularning soni bizda yetarli», degan Putin Amerika yetkazib beradigan tizimlardan Rossiya hududiga zarba berilishi ehtimoli haqida.

Rossiya prezidentining ta’kidlashicha, G‘arbning ta’minoti jangovar harakatlar paytida yo‘q qilingan qurollar o‘rnini qoplash uchun mo‘ljallangan, xolos. Uning bayonotiga ko‘ra, xuddi shu holat Rossiya havo mudofaasi go‘yoki «yong‘oqdek chaqayotgan» dronlar bilan ham yuz bermoqda.

1 iyun kuni AQSh Ukraina uchun o‘q-dori, qurollar va texnikalardan iborat yangi paket ukrain harbiylari anchadan buyon so‘rab kelayotgan HIMARS baravar o‘t ochish reaktiv tizimlarini ham o‘z ichiga olishini ma’lum qilgandi.

«HIMARS ularga [ukrainlar] qarshi turishda kengroq imkoniyatlar taqdim etadi. Hozirda biz ularga avvalroq yetkazib bergan gaubitsalar 30 km atrofidagi masofaga zarba berishi mumkin. HIMARS’ning o‘q otish masofasi ikki barobardan oshiqroq, bu esa ularga hatto kam miqdordagi uchirish qurilmalari bilan ham [rossiyalik harbiylarga] nisbatan muvaffaqiyatli qarshilik ko‘rsatish imkonini beradi», – dedi AQSh mudofaa vaziri o‘rinbosari Kolin Kal Pentagondagi brifingda.

HIMARS qanday qurol?

Amerikaliklar HIMARS uchun qanday o‘q-dori yetkazib berishi rasman ma’lum qilinmagan, ammo OAV ma’lumotiga ko‘ra, bu GMLRS yuqori aniqlikdagi raketalari bo‘ladi.

Amerikaliklarning baravar o‘t ochish reaktiv tizimlari uchun mo‘ljallangan o‘q-dorilar turli masofaga uchuvchi uch xil turda bo‘ladi. Birinchisi – maksimal uchish masofasi 32 kilometr bo‘lgan M26 yoki uning yaxshilangan zamonaviy versiyasi M26A1 (uchish masofasi 45 kilometrgacha). Uchirish konteynerida bunday raketalardan oltitasi joylashadi.

Ikkinchi o‘q-dori – 70 kilometrgacha harakatlana oladigan boshqariluvchi GMLRS raketalari (yuqorida aytilganidek Ukrainaga shunday raketalar yuboriladi). Va nihoyat oltita raketa joylashadigan odatiy konteyner o‘rniga ikki blokdan bittasiga uchish masofasi 300 kilometrni tashkil etadigan bitta ATACMS taktik raketasi joylashtirish mumkin. AQShning Ukrainaga yetkazmalari qatorida o‘q-dorining bunday turi hozircha kiritilmagan.

G‘arbdagi harbiy ekspertlar fikricha, RF armiyasining Donbassdagi ayrim muvaffaqiyatlari, jumladan Severodonetskning bir qismi egallanishi va Popasnaya hududida ilgarilashi aynan og‘ir texnika va artilleriya bobidagi ustunligi bilan bog‘liq. Shu tufayli ukrain harbiylari G‘arb yetkazib beradigan baravar o‘t ochish reaktiv tizimlari ularga urushning ilk davrida yaqin masofadagi to‘qnashuvlarda kamroq samaradorlik ko‘rsatgan rossiyaliklar qo‘shiniga samarali zarba berishda qo‘l kelishiga umid qilmoqda.