Majlislar bilan “boshqariladigan” viloyatdagi davlat tashkilotlari mas’ullari Mirzayevdan nega norozi?

8 oktyabr soat 14:30da (5) Toshkent viloyati hokimi Zoir Mirzayev boshchiligida xalq ta’limi tizimini isloh qilishga bag‘ishlangan videoselektor yig‘ilishi o‘tkazilgan.

10 oktyabr kuni soat 19:00da (6) viloyat hokimligida muammoli kreditlar mavzusida majlis bo‘lib o‘tgan.

12 oktyabrda Bosh vazir o‘rinbosari, investitsiya va tashqi savdo vaziri Jamshid Xo‘jayev rahbarligidagi ishchi guruh Toshkent viloyatini iqtisodiy-ijtimoiy rivojlantirish, investitsiya, eksport, mahalliy sanoat ko‘rsatkichlari ijrosini joyiga chiqqan holda o‘rganish o‘tkazishi rejalashtirilgan. Xuddi shu kuni 16:45da (7) bir qancha vazirlik, tashkilot hamda idoralar Toshkent viloyati hokimligi binosida o‘tadigan yig‘ilishda ishtirok etishlari so‘ralgan.

13 oktyabr kuni soat 17:30da (8) barcha davlat tashkilotlari, qolaversa, tijorat banklari rahbarlari, xo‘jalik birlashmalari ishtirokida Vazirlar Mahkamasida inflatsiya darajasi prognoz parametrlar doirasida bo‘lishini ta’minlash masalalariga bag‘ishlangan videoselektor tashkil etilgan.

14 oktyabr kuni soat 9:00da (9) viloyat hokimligi katta majlislar zalida kengaytirilgan videoselektor yig‘ilishi bo‘lib o‘tgan. Unda Shavkat Mirziyoyevning 22 sentabr kuni xalq deputatlari Toshkent viloyati kengashi sessiyadagi topshiriqlari ijrosi muhokama qilingan. Ya’ni 5 ta masala borasida nimalar qilinishi gaplashilgan.

Xuddi shu kuni ayni shu manzilda 17:00da (10) yana bir videoselektor yig‘ilishi bo‘lib o‘tgan. Unda viloyat kichik sanoat zonalari infratuzilmasi uchun ajratilgan mablag‘lar o‘zlashtirilishi, kommunikatsiyalarga ulanganlik holati hamda tabiiy gaz, ichimlik suvi, elektr energiyasi hamda chiqindi tashishda yuzaga kelgan qarzdorlikni undirish ishlari qanday borayotgani muhokama qilingan.

Qolaversa, 15 oktyabr kuni soat 16:00da (11) ham viloyat hokimligi binosida yana bir majlis chaqirilgan.

Oldinda 17 oktabr kuni soat 9:00da (12) muammoli kreditlar undirilishi, ipoteka kreditini ajratish hamda kuz-qish mavsumiga tayyorgarlik mavzusida yana bir majlis o‘tkazilishi kutilmoqda.

Shu oy hisobidan Toshkent viloyatidagi davlat idoralarida ishlovchi o‘nlab xodimlar Kun.uz’ga viloyat hokimi majlisbozlikka berilib ketganidan shikoyat qilib xatlar yo‘llashdi. Shaxsi sir qolishini istagan davlat xizmatchilarining aytishicha, ish rejimi “majlisdan majlisgacha” tamoyiliga o‘tib qolgan va mutasaddilar amaliy ish qilishga emas, majlislarda viloyat hokimidan kutilajak savollarga javob berishga odatlanishmoqda. Tinimsiz tadbirbozlik tufayli mas’ullarda o‘zlariga yuklatilgan funksional vazifalarni bajarish (bajarilishini nazorat qilish) uchun esa vaqt deyarli yo‘q.

Shu yerga kelganda o‘rinli bir savol tug‘iladi: sanab ham adog‘iga yetib bo‘lmaydigan majlis, yig‘ilish-u tadbirlar qandaydir natija beryaptimi? Yoki kimdir ishlayotganini ko‘rsatish uchungina o‘tkazilib, odamlarning vaqti o‘g‘irlanishigagina xizmat qilyaptimi?

Toshkent viloyatida rahbarlarning majlisbozlikka mukkasidan ketgani birinchi marta tanqid qilinmayapti. O‘tgan yili Kun.uz’ga shikoyat qilgan viloyat tashkilotlari mas’ullari bema’ni yig‘ilishlar ortidan ishlashga va berilgan vazifalarni bajarishga vaqt deyarli qolmayotgani, sutkaning deyarli 6-8 soati turli keraksiz yig‘ilishlarda o‘tayotganini aytgandi.

2021 yil 11 aprel – yakshanba dam olish kunida Toshkent viloyatining Nurafshon shahridagi Yoshlar ittifoqi binosida viloyat hokimligi, viloyat prokuraturasi, tuman-shaharlarning sektor rahbarlari va boshqa davlat tashkilotlarining bir qator xodimlari ishtirokida «kuz-qish mavsumiga tayyorgarlik masalasida seminar-trening» o‘tkazilib, mutasaddilardan yig‘ilishga kechikmasdan kelish bilan birga ushbu xabarni boshqa guruhlarga (har xil kanallarga) tarqatmaslik uqtirilgani oshkor bo‘lgandi.

O‘tgan yili Bosh vazir Abdulla Aripov tashkilot va idoralarda majlisbozlik to‘xtamayotgani, davlat organlari va tashkilotlarida 2-3 soatlab majlislar o‘tkazilayotganini tanqid qilgandi.

Prezident Shavkat Mirziyoyev ham majlisbozliklar ko‘payib ketganini qattiq tanqid qilib, ruxsatsiz majlis qilgan rahbarlar ishdan ketishini aytgandi.

«Ko‘p amaldorlar majlisbozlikka kasal bo‘lgan. Buni davolaymiz. Bugundan boshlab majlis qilmoqchi bo‘lgan hokimlar administratsiyadan ruxsat olib, uzog‘i 40 daqiqalik majlis o‘tkazishi mumkin. Ruxsatsiz majlis o‘tkazgan amaldorlar ishdan ketadi», degan edi prezident.

Bundan tashqari, 2021 yil 10 fevral kuni davlat rahbari yana bir bor har qanday majlisbozlikni yig‘ishtirish kerakligi haqida mas’ullarni ogohlantirgandi.

2021 yil mart oyida qabul qilingan «O‘zbekiston Respublikasi Prezidentining ayrim qonun hujjatlariga o‘zgartirish va qo‘shimchalar kiritish to‘g‘risida»gi prezident farmonida Adliya vazirligiga jumladan, davlat organlari va tashkilotlari faoliyatida ortiqcha qog‘ozbozlik va majlisbozlikka yo‘l qo‘ymaslik yuzasidan takliflar ishlab chiqish vazifasi yuklatilgan bo‘lib, bu vazifa ijrosi qay darajada ta’minlangani haqida ma’lumotga ega emasmiz.