O‘zbekistonning Malayziyadagi diplomatiya vakolatxonasi vakillari Kuala-Lumpur anjumanlar markazida bo‘lib o‘tgan “17-Malayziya xalqaro brendlar ko‘rgazmasi” tadbirida ishtirok etdi, deb xabar bermoqda “Dunyo”.
“Malayziya xalqaro brendlar ko‘rgazmasi” mashinasozlik, to‘qimachilik va trikotaj, pardoz-andoz, uy-ro‘zg‘or buyumlari, oziq-ovqat mahsulotlari ko‘rgazmasi bo‘lib, 2005 yildan beri har yili Malayziya poytaxtida o‘tkaziladi. Mazkur ko‘rgazmada mahalliy va xorijiy ishlab chiqaruvchilar o‘z mahsulotlari bilan qatnashadi. Ushbu tadbirda har yili o‘ndan ortiq mamlakatdan 500 ga yaqin kompaniyalar, dunyo 50 dan ortiq mamlakatidan salkam 10 ming kishi ishtirok etadi.
Ko‘rgazmada O‘zbekiston elchixonasi tomonidan tashkil etilgan milliy stendda mamlakatda ishlab chiqarilgan oziq-ovqat, kosmetika, ip-kalava, kabel va farmatsevtika yo‘nalishidagi mahsulotlar namoyish etildi. Tadbir davomida ko‘rgazmada ishtirok etayotgan kompaniyalar va chet ellik xaridorlar uchun biznes-forum tashkil etildi. Unda qatnashchilarga mamlakat sanoat tarmoqlari, to‘qimachilik, oziq-ovqat sanoati, milliy mahsulotlar eksport geografiyasi to‘g‘risidagi ma’lumotlar taqdim etildi.
Ko‘rgazmada mamlakatda ishlab chiqarilgan mahsulotlarga qiziqish bildirgan Malayziyaning Alpha Indera va Izdihar Souk kompaniyalari bilan mamlakatdan qayta ishlangan qishloq xo‘jaligi mahsulotlarini Malayziyaga import qilish bo‘yicha muzokaralar olib borildi.
