O‘zbekistondagi beshinchi yirik bank bo‘lmish “Ipotekabank” xususiylashtirilmoqda. Kompaniyadagi davlat ulushi to‘liq Vengriyaning OTP bankiga sotilishi bo‘yicha bitim imzolandi. Bitim narxi hozircha ochiqlanmadi. Aksiyalarning 75 foizlik dastlabki paketi uchun 2023 yil birinchi yarmida to‘lov qilinadi.
12 dekabr kuni Toshkentda O‘zbekiston hukumati va Vengriyaning OTP banki bilan “Ipotekabank”ni xususiylashtirish bo‘yicha bitim imzolandi. Bu haqda Kun.uz muxbiri xabar bermoqda.
OTP Bank O‘zbekiston Moliya vazirligiga tegishli 100 foiz aksiyalarni (jami aksiyalarning qariyb 97 foizi) ikki bosqichda sotib oladi. Dastlab, 2023 yilning birinchi yarmida aksiyalarning 75 foizi, uch yildan so‘ng qolgan 25 foizi xususiylashtiriladi.
“Ipotekabank” boshqaruv raisi Elyor Inomjonov bitim narxiga oid savolga javoban, hozircha bitimning ba’zi punktlarini oshkor eta olmasligini aytdi.
“Tranzaksiya bo‘yicha pul kelib tushgandan keyin narxini ochiqlash imkoniyati bo‘ladi”, – dedi u.
Inomjonovga ko‘ra, bu xususiylashtirish moliya-bank tizimi rivojlanishiga qo‘shimcha turtki beradi.
“OTP bankining salohiyati, yangi xizmatlar sifati va tajribasi yuqori. Bu jarayon to‘xtab qolmaydi, doimiy davom etadi. Ishonamanki, OTP bank kelgandan kelgan bank tizimining lokomotovi sifatida boshqa banklar rivojiga hissa qo‘shadi. Maqsadimiz – raqamlashtirishni yanada rivojlantirish, mijozlarga yanada sifatli xizmatlar ko‘rsatish. Shu bilan birga, bu bank kompakt bank hisoblanadi”, – dedi u.
Ma’lum qilinishicha, “Ipotekabank” xususiylashtirilgach, uning nomi o‘zgarishsiz qoladi.
Eslatib o‘tamiz, 2021 yilda Vengriyaning OTP banki “Ipotekabank”ning 75 foiz ulushini sotib olishi ma’lum bo‘lgandi. Bu haqda O‘zbekiston birinchi iqtisodiy forumida bosh vazir o‘rinbosari Jamshid Qo‘chqorov aytib o‘tgandi.
Shundan keyin 2022 yilning aprel oyida Vengriya banki Ukraina-Rossiya urushi sababli xususiylashtirish bo‘yicha to‘lovlarni bir necha oyga ortga surish uchun murojaat qildi.
Xususiylashtirish jarayoni 2022 yilning noyabr oyida tiklandi.
Moliya vazirligiga ko‘ra, “Ipotekabank” 8,5 foiz bozor ulushi va 1,6 milliondan ortiq chakana mijozlari bilan O‘zbekistondagi beshinchi yirik bank hisoblanadi.
