UzAirways'ni “mintaqadagi yetakchi aviakompaniya”ga aylantirish rejasi prezidentga taqdim etildi

Prezident Shavkat Mirziyoyev 14 dekabr kuni “Uzbekistan Airways” aksiyadorlik jamiyatini transformatsiya qilishga oid takliflar taqdimoti bilan tanishdi.

Fuqaro aviatsiyasi korxonalarini transformatsiya qilish bo‘yicha vazifalar 2021 yil 30 apreldagi prezident qarorida belgilangan edi. Jarayonga xorijiy konsultantlar jalb etilgan. Xususan, “Uzbekistan airways” AJni isloh qilish bo‘yicha turkiyalik mutaxassis Ilker Ayji jamoasi bilan ish olib borilmoqda. U “Turk havo yo‘llari” aviakompaniyasini boshqargan kezda uni mintaqaviy darajadan global miqyosga muvaffaqiyatli olib chiqqan, deyiladi rasmiy xabarda.

Qayd etilishicha, bugun Uzbekistan Airways oldiga ham shunday vazifa qo‘yilgan. O‘zbekistonning geografik joylashuvi va soha infratuzilmasidan oqilona foydalanib, uni xalqaro transport xabiga aylantirish ko‘zda tutilgan.

Taqdimotda davlat rahbariga “O‘zbekiston havo yo‘llari”ni transformatsiya qilish va rivojlantirish bo‘yicha ishlab chiqilgan strategiya haqida axborot berildi.

Unga ko‘ra, aviakompaniyaga xalqaro tajriba asosida korporativ boshqaruv tizimi joriy etish, havo kemalarini ko‘paytirish, xizmatlar sifatini oshirish va yuk tashish tarmog‘ini kengaytirish choralari ko‘riladi. Xorijiy investorlarni jalb etgan holda aviakompaniyani jahon standartlari asosida xususiylashtirish ishlari yakuniga yetkaziladi.

“Maqsad – “O‘zbekiston havo yo‘llari”ni yetakchi mintaqaviy aviakompaniyaga aylantirish, shuningdek, aholining mahalliy va xalqaro yo‘nalishlarda arzon narxlarda harakatlanishini ta’minlashdan iboratdir”, – deyiladi xabarda.

Prezident bu rejalarni ma’qullab, uning ijrosiga tezroq kirishish kerakligini ta’kidlagan.

“Bu sohada o‘n yilga kechikkanmiz. Aviakompaniya eskicha uslubda ishlayapti, yo‘lovchilar xizmat sifatidan rozi emas. Agar iqtisodiyotimizni, turizmni rivojlantiramiz desak, yakka-yu yagona yo‘limiz shu”, – degan Shavkat Mirziyoyev.

Aviakompaniyada loyiha ofisi tuzib, transformatsiya jarayonini muvofiqlashtirib borish bo‘yicha tavsiyalar berilgan.

Eslatib o‘tamiz, avgust oyida Davlat aktivlarini boshqarish agentligi Uzbekistan Airways'ni xususiylashtirish strategiyasini ishlab chiqish uchun professional konsalting kompaniyasi tanlab olinishi yuzasidan tanlov e’lon qilgandi.