Farhod Ermanov Qoraqalpog‘iston Vazirlar Kengashi raisi lavozimini egalladi

Prezident matbuot kotibi xabariga ko‘ra, u Qoraqalpog‘iston Respublikasi Jo‘qorg‘i Kengesi tomonidan Qoraqalpog‘iston Vazirlar Kengashi raisi lavozimiga tasdiqlandi.

Avvalroq Qoraqalpog‘iston Vazirlar Kengashi Raisi lavozimini egallab kelgan Qahramon Sariyev prezidentning davlat xizmati, aholi bilan muloqot va mahalliy hokimiyat organlari faoliyatini muvofiqlashtirish masalalari bo‘yicha maslahatchisi birinchi o‘rinbosari lavozimiga tayinlangandi. 

Farhod Ermanov 1958 yil Qoraqalpog‘iston Respublikasi, Amudaryo tumanida tug‘ilgan. 1981 yilda Toshkent irrigatsiya va qishloq xo‘jaligini mexanizatsiyalash muhandislari instituti, 1996 yilda Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi: muhandis-mexanik, iqtisodchi.

U mehnat faoliyatini 1975 yilda Amudaryo tumani Mang‘it shahri profilaktika-dezinfeksiyalash bo‘limi ishchisi lavozimidan boshlagan.

Farhod Ermanov 1995-1998 yillarda Amudaryo tumani hokimi, 1998-2002 yillarda Amudaryo tumani "Mang‘it" xo‘jaligi raisi, 2002-2003 yillarda Amudaryo tumani hokimining qishloq va suv xo‘jaligi bo‘yicha birinchi o‘rinbosari, tuman qishloq va suv xo‘jaligi boshqarmasi boshlig‘i, 2003-2004 yillarda Amudaryo tumani qishloq va suv xo‘jaligi bo‘limi boshlig‘i bo‘lgan.

2004-2010 yillarda Qoraqalpog‘iston qishloq va suv xo‘jaligi vaziri, 2010-2018 yillarda Beruniy tumani hokimi, 2018 yil 21 apreldan Xorazm viloyati hokimi vazifasini bajaruvchi sifatida ishlagan. 2018 yil 30 noyabrdan Xorazm viloyati hokimi etib tasdiqlangan.