Mahallabay agentligida o‘yinlar davom etadi. Shubhali tenderlar bo‘yicha baribir shartnomalar tuzildi

Mahallabay ishlash va tadbirkorlikni rivojlantirish agentligining Toshkent shahar boshqarmasi tomonidan tikuv mashinasi xaridi uchun o‘tkazilgan, umumiy qiymati 3,4 mlrd so‘mlik tenderlarda ochilganiga 1, 2, 3 va 4 kun bo‘lgan firmalar, ya’ni tender bo‘lib o‘tayotgan vaqtda ochilgan yangi korxonalar g‘olib bo‘lgan edi. Kun.uz bu haqda 30 noyabrdagi maqolada e’tibor qaratgandi.

Agentlik holatga 2 dekabr kuni munosabat bildirib, bu shubhali xaridlar bo‘yicha o‘rganish ishlari boshlangani, tekshiruvga Monopoliyaga qarshi kurashish qo‘mitasi xodimlari ham jalb etilganini ma’lum qilgandi. Oradan 18 kun o‘tdi, lekin tekshiruv natijalari bo‘yicha ma’lumotlar taqdim etilmadi.

Bugunga kelib esa shubhali tenderlarning to‘rtalasi bo‘yicha ham shartnomalar imzolangani ma’lum bo‘ldi.

1-holat. 885 mln so‘m

888 mln so‘mlik tenderda tender tugashiga 4 kun qolganda ochilgan «SOLD IT 1111» MChJ g‘olib deb topilgandi, bu korxona bilan 6 dekabr kuni 885 mln so‘mlik shartnoma tuzilgan.

2-holat. 701 mln so‘m

726 mln so‘mlik tenderda tender tugashiga 1 kun qolganda ochilgan «INTEND 045» MChJ g‘olib deb topilgandi, bu korxona bilan 6 dekabr kuni 701 mln so‘mlik shartnoma tuzilgan.

3-holat. 855 mln so‘m

900 mln so‘mlik tenderda tender tugashiga 2 kun qolganda ochilgan «BRAND MIX 777» MChJ g‘olib deb topilgandi, mazkur MChJ bilan 6 dekabr kuni 855 mln so‘mlik shartnoma tuzilgan.

4-holat. 905 mln so‘m

908 mln so‘mlik tenderda esa tender tugashiga 3 kun qolganda ochilgan «Business Communication Trade» MChJ g‘olib deb topilgandi, mazkur MChJ bilan 25 noyabr kuni 905 mln so‘mlik shartnoma tuzilgan.

Kun.uz bu korxonalarning hammasi Farg‘ona viloyatining Qo‘qon shahrida joylashgani, o‘zaro yaqin qarindoshlarga tegishli bo‘lishi mumkinligiga e’tibor qaratgandi. Qolaversa, tikuv mashinalari uchun 6 mln so‘m atrofidagi narx bozor narxidan qimmat bo‘lishi mumkinligi qayd etilgandi. Lekin bu holatlarning hech biriga Monopoliyaga qarshi kurashish qo‘mitasi ham, Korrupsiyaga qarshi kurashish agentligi ham e’tibor qaratmayapti.

Agentlik mazkur holatlar bo‘yicha o‘rganish boshlangani haqida 2 dekabr kuni rasmiy munosabat bildirgandi, shartnomalar esa 6 dekabrda tuzilgan.

Kun.uz, shuningdek, bu yil Toshkent shahar hokimligi o‘tkazgan 6 ta festival 4 ta firmaga bo‘lib berilgani haqida 12 dekabr kuni xabar bergan edi. Qator shartnomalar tendersiz tuzilgani, qator tenderlar festivallar o‘tib bo‘lganidan bir necha oy keyin o‘tkazilgani (post-faktum), shahar hokimi bu festivallarga pul ajratish haqidagi qarorlarini ommadan yashirgani holatlari bo‘yicha ham rasmiy idoralardan munosabat bo‘lmadi.