O‘zbekiston Turkmaniston gazidan ishlab chiqarilgan elektr energiyasini Qirg‘izistonga yetkazib berdi

O‘zbekiston Energetika vazirligi va Qirg‘iz Respublikasi Energetika vazirligining qo‘shma bayonoti e’lon qilindi.

Unda aytilishicha, 2021 yilning 11 mart kuni Qirg‘iziston Energetika va sanoat vazirligi, O‘zbekiston Energetika vazirligi hamda O‘zbekiston Suv xo‘jaligi vazirligi o‘zaro bayonnoma imzolagan. Unga ko‘ra, elektr energiyasini o‘zaro yetkazib berish tasdiqlangan jadvallarga muvofiq amalga oshiriladi.

«Markaziy Osiyo mintaqasida suv taqchilligi hisobga olinib, «To‘xtagul» suv omborining o‘ta og‘ir darajaga tushishiga yo‘l qo‘ymaslik maqsadida, tomonlarning xo‘jalik yurituvchi sub’yektlari o‘rtasidagi kelishuvlarga asosan, Turkmaniston gazidan ishlab chiqarilgan elektr energiyasi Qirg‘izistonga yetkazib berildi.

Shu bilan birga, shartnoma asosidagi kelishuvlarga muvofiq, elektr energiyasini Turkmanistondan Qirg‘izistonga O‘zbekiston energetika tizimi orqali tranzit qilish energetika tizimlarining imkoniyatlaridan kelib chiqqan holda amalga oshirilmoqda.

Ta’kidlash lozimki, tomonlarning xo‘jalik yurituvchi sub’yektlari o‘rtasida 2023 yilda Turkmaniston elektr energiyasi tranzitini ta’minlashga qaratilgan tegishli shartnomalar imzolangan.

Ikki mamlakat Energetika vazirliklari va energetika korxonalari o‘rtasidagi hamkorlik o‘zaro hurmat va energetika tizimlari ishlash rejimining izchilligi tamoyillari asosida amalga oshirilmoqda», deyiladi O‘zbekiston Energetika vazirligi bayonotida.

Ma’lumot uchun, Qirg‘izistonda elektr energiyasi asosan GESlarda, O‘zbekistonda esa IESlarda ishlab chiqariladi. Ayni paytda, Qirg‘izistonning Jalolobod viloyatida joylashgan «To‘xtagul» suv omboridagi suv yildan yilga kamayib bormoqda. Suv sathi “o‘lik chegara”gacha tushishi mumkinligi ham aytiladi. Bu esa mintaqaning energetika tizimi va qishloq xo‘jaligiga salbiy ta’sir qiladi.

Qirg‘iziston kuz-qish oylarida elektrga talab ortgan vaqtda elektr generatsiya qilish maqsadida ombordagi suvni ko‘p miqdorda chiqarib yuborsa, bu suvning o‘rnini bahor-yoz oylarida to‘ldirishga majbur bo‘ladi, bu esa O‘zbekistonning Farg‘ona, Andijon, Namangan, Jizzax va Sirdaryo viloyatlari qishloq xo‘jaligiga salbiy ta’sir qiladi.

«Mavsumiy energiya almashinuvi yo‘lga qo‘yilgan. Bahorda va kuzda elektr energiyasini biz ularga yetkazib beramiz, ular esa bizga yozda qaytarib berishadi. Natijada, bizning qishloq xo‘jaligimiz ko‘proq suvga ega bo‘ladi va aksincha ularning suv omborlarida qish oylari uchun ko‘proq suvni saqlash imkoniyatlari yuzaga keladi», deya tushuntirgandi energetika vaziri o‘rinbosari Sherzod Xo‘jayev.