AQSh ikki tadbirkorni Vekselbergning yaxtasini yashirganlikda aybladi

AQSh hukumati ikki tadbirkorni sanksiyalar ro‘yxatiga kiritilgan rossiyalik oligarx Viktor Vekselbergga tegishli Tango yaxtasini sanksiyalardan olib chiqishga urinishda aybladi. Rossiya va Shveytsariyaning ikki fuqaroligiga ega 51 yoshli Vladislav Osipov hamda 52 yoshli britaniyalik Richard Masters AQShni aldash, sanksiyalar rejimini buzish va pul yuvishda ayblanmoqda. Bu haqda Amerika Adliya vazirligi 20 yanvar, juma kuni xabar berdi.

Ayblov xulosasiga ko‘ra, 2018 yilda Oq uy tomonidan Vekselbergga nisbatan joriy qilingan sanksiyalarga qaramay, Osipov va Masters Amerika kompaniyalari va AQSh moliya tizimidan foydalanib, Vekselberg yaxtasiga egalik huquqini yashirishga va uning ishlashini ta’minlashga harakat qilishgan. Aytilishicha, xususan, Masters yaxta uchun soxta nom – Fanta'ni ishlatish sxemasini ishlab chiqqan. «Ushbu niqob natijasida Amerika moliya institutlari Tango foydasiga yuz minglab dollarlik operatsiyalarni amalga oshirdi, agar ular Vekselbergning moliyaviy operatsiyalarga aloqadorligi haqida bilganida, bunga yo‘l qo‘ymagan bo‘lardi», — deyiladi Adliya vazirligi bayonotida.

Masters o‘sha kuni Ispaniyada Qo‘shma Shtatlar talabiga binoan qo‘lga olindi, u ekstraditsiya qilinishi kutilmoqda. Osipovni hibsga olish uchun order berilgan.

Milliarder Viktor Vekselberg Rossiya prezidenti Vladimir Putinga yaqin shaxs sanaladi. Tadbirkor metallurgiya, tog‘-kon sanoati, texnologiya va boshqa aktivlarni o‘z ichiga olgan Moskvadagi Renova Group konglomeratiga rahbarlik qiladi. U 2018 yilning aprelida Rossiyaning AQSh saylovlariga aralashuviga aloqadorlikda gumon qilinib, AQSh sanksiyalari ro‘yxatiga kiritilgan edi. Uning mamlakatdagi barcha aktivlari muzlatilgan, Amerika kompaniyalariga u bilan bitimlar tuzish taqiqlangan.

Rossiyaning Ukrainadagi agressiyasi fonida AQSh va uning xalqaro hamkorlari Kreml tarafdorlariga nisbatan jazo choralarini kuchaytirdi. 2022 yil aprel oyida Ispaniya hukumati AQSh talabiga binoan Vekselbergning 78 metrlik, 90 million dollarga baholangan Tango yaxtasini Mayorkada xatlovga oldi.