Yevropa Ittifoqi Ukrainaga yana 500 mln yevro miqdorida harbiy yordam ajratadi

Yevropa Ittifoqi mamlakatlari tashqi ishlar vazirlari kengashi Ukrainaga Yevropa tinchlik jamg‘armasi (European Peace Facility) orqali umumiy qiymati 500 million yevro bo‘lgan yettinchi harbiy yordam transhini berishga kelishib oldi. Bu haqda 23 yanvar, dushanba kuni Bryusselda bo‘lib o‘tgan matbuot anjumanida Yevropa Ittifoqining tashqi ishlar va xavfsizlik bo‘yicha oliy vakili Jozep Borrel ma’lum qildi.

U, shuningdek, YeI davlatlari tomonidan Ukraina harbiylarini tayyorlash bo‘yicha Yevropa Ittifoqining maxsus missiyasi uchun yana 45 million yevro ajratish bo‘yicha kelishuvga erishilganini ma’lum qildi. 15 000 nafar ukrainalik askarni asosiy tayyorgarlikdan o‘tkazish uchun mo‘ljallangan ushbu missiya 2022 yil oxirida Polshada boshlangan.

Shu tariqa, YeI tomonidan 2021 yilda asos solingan Yevropa tinchlik jamg‘armasi orqali Ukrainaga ajratiladigan mablag‘ 3,6 milliard yevroga yetadi. Ayni paytda, Yevropa Ittifoqi va unga a’zo davlatlar tomonidan Ukrainaga ko‘rsatilgan yordamning umumiy miqdori 50 milliard yevroga yaqinlashdi va bu Yevropa Ittifoqini Ukrainaga yordam ko‘rsatish bo‘yicha dunyoda yetakchiga aylantirdi, dedi Borrel.

Bundan tashqari, Yevropa Ittifoqi tashqi ishlar kengashi Ukrainadagi harbiy jinoyatlar jazosiz qolishi mumkin emas degan fikrda, dedi Yevropa diplomatiyasi rahbari. Uning so‘zlariga ko‘ra, yig‘ilishda aybdorlarni javobgarlikka tortish imkoniyatlari muhokama qilingan. Bu muhokama BMTda, shu jumladan, navbatdagi Bosh assambleya kontekstida ham olib borilmoqda, dedi Borrel. Uning so‘zlariga ko‘ra, jinoyatchilarni javobgarlikka tortish yo‘lidagi birinchi qadam Xalqaro jinoiy sud ko‘magida Haagada xalqaro prokuratura tashkil etilishi bo‘ladi.

Ukrainaga Germaniyaning Leopard 2 tanklarini yetkazib berish haqida so‘ralganda, u Germaniya ushbu tanklarni Ukrainaga topshirishni istagan boshqa mamlakatlarga to‘sqinlik qilmasligini aytdi va Ramshtayndagi uchrashuvning «ta’sirchan natijalarini» baholashni so‘radi.