Fransiya va Italiya SAMP/T-Mamba o‘rta masofaga mo‘ljallangan havo mudofaa tizimini joriy yilning bahorida Kiyevga topshirishga qaror qildi. Bu haqda Fransiya mudofaa vaziri Sebastyan Lekornyu Twitter’da yozdi.
Sebastyan Lekornyuning ta’kidlab o‘tishicha, bu uning italiyalik hamkasbi Gvido Krozetto bilan qo‘shma qaror bo‘lgan. Ular zudlik bilan Ukraina mudofaa vaziri Oleksiy Reznikovga bu haqda xabar berishgan.
Lekarnyuning qayd etishicha, SAMP/T-Mamba majmuasi Ukrainaning tinch aholisi va infratuzilmasini Rossiya hujumlaridan himoya qiladi.
Avvalroq Fransiya va Avstraliya Ukraina uchun birgalikda bir necha ming 155 mm artilleriya snaryadlarini ishlab chiqarishga kelishib olgandi. Bu haqda Fransiya mudofaa vaziri Sebasten Lekornyu Parijda ikki davlat tashqi ishlar vazirlari va mudofaa idoralari uchrashuvi yakunlari bo‘yicha o‘tkazilgan matbuot anjumanida ma’lum qildi.
Lekornyuning so‘zlariga ko‘ra, fransuzning Nexter qurol kompaniyasi snaryadni to‘g‘ridan to‘g‘ri ishlab chiqarish bilan shug‘ullanadi va buning uchun zarur poroxni Avstraliya yetkazib beradi. Ishlab chiqarish xarajatlari ham ikki davlat o‘rtasida taqsimlanadi.
Fransiya Mudofaa vazirligi rahbari hamkorlik bo‘yicha erishilgan kelishuvni «misli ko‘rilmagan» deb atadi. Uning avstraliyalik hamkasbi Richard Marles qo‘shimcha qildi: «Bu Fransiya va Avstraliya Ukrainaga u bu mojaroga bardosh bera olishi va uni o‘z shartlari asosida yakunlashi uchun ko‘rsatayotgan doimiy yordam darajasining bir qismidir».
