“Toshkent metropoliteni”ning Kun.uz’ga ma’lum qilishicha, vagonlar sonini oshirish maqsadida 8 ta metro poyezdi uchun “Toshkent yo‘lovchi vagonlarni qurish va ta’mirlash zavodi” AJga buyurtma berilgan, hujjatlar rasmiylashtirilgan.
“Avvalroq Kun.uz’ga 8 ta emas, 6 ta vagonga buyurtma berilgani haqida xabar bergan edik. Ularning soni yana 2 taga ko‘paydi, endilikda 5 ta vagonli 4 ta harakat tarkibini 12 taga yetkazish kutilmoqda.
Hozirda “Chilonzor” va “O‘zbekiston” yo‘nalishlarida yo‘lovchilar oqimi ko‘p. Ayni vaqtda “Yunusobod” liniyasida ham odamlar soni oshmoqda. Ertalabki tirband vaqtlarda ham poyezdlar 1,5-2 daqiqa intervalda harakatlanyapti. Shundan kelib chiqib, “O‘zbekiston” yo‘nalishidan boshqa yo‘nalishlarga ham poyezdlar taqsimlanadi. Bu “Chilonzor” yoki “Yunusobod” yo‘nalishi ham bo‘lishi mumkin”, – deydi mas’ul.
Shuningdek, xodimning ta’kidlashicha, Moskvadan olib kelinadigan 14 ta poyezd uchun ham buyurtmalar berib bo‘lingan va hujjatlarga imzo chekilgan. Ular yil davomida bosqichma-bosqich olib kelinadi.
Eslatib o‘tamiz, jami 56 ta vagonli bu yangi poyezdlar Rossiyaning “Metrovagonmash” kompaniyasi tomonidan ishlab chiqarilgan bo‘lib, unda 250-300 nafar yo‘lovchi bemalol ketishi mumkin bo‘ladi.
Hozircha poyezdlar qaysi oyda, qancha summaga olib kelinishi aniq emas.
