Xitoy kompaniyasi O‘zbekistonda bir necha quyosh fotoelektr stansiyalarini quradi

Energetika vaziri boshchiligidagi delegatsiya a’zolarining Xitoy Xalq Respublikasiga amaliy tashrifi doirasida Qashqadaryo, Buxoro va Samarqand viloyatlarida umumiy quvvati 2000 MVt bo‘lgan quyosh fotoelektr stansiyalarini qurish bo‘yicha CEEC Energy China kompaniyasi bilan anglashuv memorandumi imzolandi.

Vazirlik xabariga ko‘ra, Xitoy kompaniyasi O‘zbekistonga 2 mlrd dollar miqdorida to‘g‘ridan to‘g‘ri investitsiya kiritadi.

“Ushbu quyosh fotoelektr stansiyalari 2023 yil yakuniga qadar ishga tushirilishi rejalashtirilgan bo‘lib, 2024 yildan to‘liq quvvat bilan ishlay boshlaydi. Buning natijasida yiliga 5,2 mlrd kVt⋅soat elektr energiyasi ishlab chiqarilib, 1,4 mlrd kub metr tabiiy gaz tejalishiga erishiladi”, deyiladi rasmiy axborotda.

Mazkur loyihalar bo‘yicha tender o‘tkazilgani yoki yo‘qligi ma’lum emas. Shuningdek, stansiyalar ishlab chiqargan elektr energtiyasini davlat qancha narxda kafolatli sotib olishi ham ochiqlanmadi.

Avvalroq energetika vaziri Jo‘rabek Mirzamahmudov quyosh fotoelektr stansiyalarini tezroq qurish uchun loyihalar tendersiz tanlanishini aytgandi. Bunda investorlarga elektr energiyasi davlat tomonidan faqat oxirgi tenderlardagi narxlardan (2,8 sent) oshirilmagan narxlarda sotib olinishi sharti qo‘yiladi, degandi u.

Eslatib o‘tamiz, dekabr oyida Namanganda quvvati 150 MVt bo‘lgan quyosh fotoelektr stansiyasini qurish bo‘yicha Xitoyning GD Power – Powerchina kompaniyasi tender g‘olibi deb topilgandi. Mazkur kompaniya har bir kilovatt-soat elektrni 4,828 sentdan yetkazib berish bo‘yicha taklif bildirgan. Energetika vazirligi taklifni juda qimmat deb hisoblab, narxni pasaytirish choralari ko‘rilishini ma’lum qilgandi.