O‘zbekiston va Ozarboyjon Transkaspiy transport yo‘lagi orqali yuk tashish hajmini oshiradi

13-15 fevral kunlari bo‘lib o‘tgan ushbu safar davomida O‘zbekiston va Ozarboyjon o‘rtasida transport va tranzit yuk tashuvlari masalalari bo‘yicha Qo‘shma ishchi guruhining birinchi yig‘ilishi o‘tkazildi. 

Unda Transkaspiy xalqaro transport yo‘lagi hamda 6 davlat (Ozarboyjon, Gruziya, Qirg‘iziston, Turkmaniston, Turkiya, O‘zbekiston) temiryo‘l tuzilmalari ishtirokida tashkil etilgan CASCA+ multimodal transport yo‘lagi orqali yuk tashuvlar hajmini oshirish, shuningdek, infratuzilmani rivojlantirish, tashuv jarayonlarida qulay sharoitni yaratish bilan bog‘liq masalalar muhokama etildi.

Ozarboyjonning yerusti transporti qo‘mitasi, «Ozarboyjon temiryo‘li», «Boku xalqaro dengiz savdo bandargohi», «Ozarboyjon Kaspiy dengiz kemachiligi» kompaniyasi hamda Boku kemasozlik zavodi rahbariyati bilan uchrashuvlar o‘tkazildi.

Uchrashuvlar davomida O‘zbekistonning eksport va import yuklarini Ozarboyjon hududi orqali Yevropa va Amerika qit’asi davlatlariga tashuvlarni uzluksiz tashkil etish, yuk tashuvlar xarajatini va muddatini qisqartirish, tarif imtiyozlarini kengaytirish, port infratuzilmasidan samarali foydalanish hamda logistika zanjirini yaratish bo‘yicha muzokaralar olib borildi.