Polsha armiya modernizatsiyasi doirasida 1000 ta Borsuk piyoda jangovar mashinasini sotib oladi

Polsha mudofaa vaziri Mariush Blashchak Polshaning Huta Stalowa Wola qurol kompaniyasi bilan 1000 dona Borsuk piyoda jangovar mashinasi va 400 dona hamrohlik qiluvchi texnika ishlab chiqarish bo‘yicha hadli shartnomani imzoladi, deb xabar beradi 28 fevral, seshanba kuni harbiy idora.

Shartnoma Polsha mudofaa sanoati tarixidagi eng yirik bitim bo‘ladi, deya qayd etdi Polsha Mudofaa vazirligi. «Bu tarixiy kelishuv. Sobiq sovet davridagi BVP-1 tarixga aylanmoqda. Polsha konstruktorlari tomonidan ishlab chiqilgan va Huta Stalowa Wola tomonidan ishlab chiqariladigan Borsuk bu mashinani muvaffaqiyatli almashtiradi. Biz uni jihozlash orqali Polsha armiyasini mamlakatimizda ishlab chiqarilgan asbob-uskunalar bilan mustahkamlayapmiz. Qachonki, bunday imkoniyatlar mavjud bo‘lsa, ulardan foydalanamiz», — dedi Blashchak.

Birinchi to‘rtta piyoda jangovar mashina Polsha armiyasiga 2023 yilda yetkazib berilishi kerak. Blashchakning so‘zlariga ko‘ra, keyingi yetkazib berishlar «tezkorlik bilan amalga oshiriladi», ammo vazir aniq sanalarni aytmadi. Polsha ommaviy axborot vositalari ta’kidlaganidek, hukumat yangi "BMP" sotib olishni rejalashtirgan, ammo Rossiyaning Ukrainaga bostirib kirishi tufayli bu jarayonni tezlashtirdi.

Polshaning yangi piyoda jangovar mashinalarini sotib olishi mamlakat armiyasini keng ko‘lamli modernizatsiya qilish doirasida amalga oshirilmoqda. «Intensiv modernizatsiya ishlari olib borilmoqda. Iloji bo‘lsa, biz Polshada ishlab chiqarilgan zamonaviy jihozlarga buyurtma beramiz», deb yozadi mamlakat Mudofaa vazirligi va Polsha armiyasi «Yevropadagi eng kuchli va eng jihozlangan armiyalardan biriga aylanib borayotganini» ta’kidladi.