Litva maxsus xizmatlari: Kreml Ukrainadagi urushni davom ettirmoqchi

Kreml bu yil Ukrainadagi urushni davom ettirishga qodir va bunga tayyor, shuningdek, buning uchun davlatning barcha resurslarini safarbar qilishi mumkin. Bu haqda Litva harbiy razvedkasi va kontrrazvedkasining yillik hisobotida aytilgan. Reuters agentligi undan ayrim parchalarni keltirdi. 

Litva maxsus xizmatlariga ko‘ra, Rossiya Boltiq dengizi mintaqasida harbiy salohiyatni tezroq tiklashga ustuvor ahamiyat beradi. Hisobotda, shuningdek, Rossiya va Xitoyga aloqador hakerlar Litva hukumati kompyuterlariga bir necha bor buzib kirishga uringani aytiladi. 

«Litvaga qarshi faoliyat yuritayotgan eng faol kiberguruhlar Rossiya Federatsiyasi va Xitoy bilan bog‘langan», — deyiladi hisobotda. «Ularning ustuvor vazifasi - Litvaning ichki va tashqi ishlari bo‘yicha doimiy ma’lumot to‘plash bo‘lib qolmoqda», deyiladi hisobotda.

Bundan oldin Boltiqbo‘yi davlatlari G‘arbni Ukrainaga qurol yetkazib berish sur’atini tezlashtirishga chaqirgandi. Tegishli bayonotlar Tallinda bo‘lib o‘tgan Estoniya, Latviya va Litva hukumat rahbarlarining uch tomonlama uchrashuvida aytilgan.

«Kelgusi oylar juda qiyin bo‘ladi. Ular hatto bu urushda hal qiluvchi rol o‘ynashi mumkin», - dedi Litva bosh vaziri Ingrida Shimonite. «Shuning uchun biz Ukrainani, birinchi navbatda, harbiy yordam masalasida qo‘llab-quvvatlashimizni tezlashtirishimiz va kuchaytirishimiz kerak», dedi u.