«Hammani oyoq uchida ko‘rsatadi» - xodimlari Toshkent viloyati prokuroridan norozi

Toshkent viloyat prokuraturasining bir necha xodimi Kun.uz’ga murojaat qilib, viloyat prokurori Shavkatjon Rahimov viloyat prokuraturasi mahkamasi va tuman-shahar prokuraturalaridagi muhitni og‘ir ahvolga keltirib qo‘ygani haqida xabar berdi. 

Murojaatda aytilishicha, Shavkatjon Rahimov yangi lavozimda ish boshlagach, ko‘plab xodimlarni ishdan bo‘shatgan, majburan pensiyaga chiqarib yuborgan yoki intizomiy jazoga tortgan. Bo‘lim boshliqlarini esa quyi lavozimlarga o‘tkazgan.

Jumladan, Iqtisodiy sohada qonunchilik ijrosi ustidan nazorat bo‘limi boshlig‘i, Uyushgan jinoyatchilik va korrupsiyaga qarshi qarshi kurashish bo‘limi boshlig‘i, Murojaatlar bilan ishlash bo‘limi boshlig‘i, viloyat prokurorining jamoatchilik bilan aloqalar va huquqiy axborot bo‘yicha katta yordamchisi lavozimidan olinib, quyi lavozimlarga tushirilgan. Moliya-xo‘jalik bo‘limi boshlig‘i esa ishdan bo‘shatilgan.

Bundan tashqari, viloyat prokurori o‘tgan davrdagi faoliyati davomida 20 nafarga yaqin xodimlarni intizomiy jazoga tortgan, 10 nafarga yaqin yosh xodimlarni viloyat prokuraturasidan quyi prokuraturalarga tushirgan. 3 nafar xodim tizimdan bo‘shatilib, 5 nafarga yaqini majburan pensiyaga chiqarilgan.

«Xodimlarga har chorakda berilishi majburiy bo‘lgan mukofot pullari 40 nafardan ortiq xodimga yaxshi ishlamaganlik vaji bilan berilmadi. Bu qonunchilikka zid harakat. “Bermayman, qayerga borsa borsin”, deya oyoq tirab oldi. Qolgan xodimlarga esa mukofot pullari berildi.

Viloyat prokuraturasida muhit umuman yaxshi emas. Hech kimni mensimaydi, hammani oyoq uchi bilan ko‘rsatadi. Nafaqat xodimlar, balki boshqa tashkilot rahbarlariga, hatto hokimlarga ham tazyiqlar o‘tkazib, haqorat qilyapti», — deyiladi murojaatda.

Murojaatda Shavkatjon Rahimov ayrim bo‘shagan lavozimlarga o‘z tanishlarini joylashtirgani, masalan, Uyushgan jinoyatchilik va korrupsiyaga qarshi kurashish bo‘limi boshlig‘i lavozimiga tayinlangan shaxs uning qudasi ekani aytiladi.

Kun.uz ushbu holat yuzasidan viloyat prokurorining jamoatchilik bilan aloqalar va huquqiy axborot bo‘yicha katta yordamchisi matbuot kotibi lavozimida ishlab kelgan Arslon Toshpo‘latov bilan bog‘landi. U mazkur lavozimdan ketganini tasdiqlab, yuqorida aytilgan vajlar bo‘yicha aniq ma’lumot berolmasligi, ammo qanday chora ko‘rilgan bo‘lsa barchasi qonun doirasida amalga oshirilgani, batafsil tafsilotlarni Bosh prokuraturadan olish maqsadga muvofiq ekanini bildirdi.

Ma’lumot uchun, Shavkatjon Rahimov 2022 yilning sentabr oyi oxirida Toshkent viloyati prokurori lavozimiga tayinlangandi. Bungacha u O‘zbekiston bosh prokuror o‘rinbosari lavozimida ishlagan.