Rossiyaning «Yandeks» kompaniyasi yandex.kz mahalliy domenining serverlarini Qozog‘iston hududiga o‘tkazish ishlarini yakunladi. Bu haqda Qozog‘iston Raqamli rivojlanish vazirligi xabar berdi.
«Yandeks» qozog‘istonliklar uchun o‘z xizmatlarini mahalliylashtirish bo‘yicha tizimli ish olib bormoqda. Serverlarni mamlakatga o‘tkazish muhim qadamdir. Bu bizning foydalanuvchilarimiz ma’lumotlari Qozog‘istonda qayta ishlanishini anglatadi. Vazirlik fuqarolarning shaxsiy ma’lumotlar xavfsizligiga katta e’tibor qaratadi», deya ta’kidlagan Qozog‘iston raqamli rivojlanish vaziri Bagdat Musin.
Ma’lumotlarga ko‘ra, Qozog‘istonda «Yandeks» xizmatlarining oylik auditoriyasi 10 millionga yaqin foydalanuvchini tashkil qiladi.
Nimaga Qozog‘iston hukumati «Yandeks»ga bunday talab qo‘ygandi?
«Yandeks» kompaniyasining bir nechta onlayn servislari qatorida taksi xizmati ko‘rsatuvchi ilova-agregator ham bor. «Yandex Go» va «Yango» nomlari ostidagi agregator Rossiyadan tashqari O‘zbekiston, Qozog‘iston, Gruziya, Armaniston, Belarus, Isroil, Norvegiya, Finlandiya kabi (jami 20 dan ortiq) mamlakatlarda ishlaydi.
2023 yil 1 sentabrdan boshlab Rossiya maxsus xizmatlariga taksi buyurtmalari xizmati ma’lumotlar bazalariga kirish vakolati berilgan edi.
RFda bu borada qonun qabul qilinganidan keyin Qozog‘istonda Yandex.kz domeni o‘chirib qo‘yilgandi. Qozog‘iston Raqamli taraqqiyot vazirligi Rossiya kompaniyasidan «huquq-tartibot organlar va maxsus xizmatlar bilan aloqalari» haqida tushuntirish berishni so‘ragandi. Shuningdek, Gruziya shaxsiy ma’lumotlar xavfsizligi xizmati «Yandeks Go» servisining foydalanuvchilar ma’lumotlarini qayta ishlash jarayoni qonunga muvofiqligini tekshirish uchun o‘rganish ishlarini boshlagandi. Finlandiya va Norvegiyaning vakolatlari organlari «Yandeks»dan foydalanuvchilarning ma’lumotlarini Rossiyaga uzatishni to‘xtatishni talab qilgandi
