Abdulla Aripovga 8 ta tuman hokimining lavozimiga loyiqligini hal qilish topshirildi

Bosh vazirga Andijon viloyatining Baliqchi va Jalalquduq, Toshkent shahrining Bektemir, Mirobod, Olmazor, Chilonzor, Yunusobod va Yakkasaroy tumanlari hokimlarining lavozimiga loyiqligini hal qilish topshirildi. Bu haqda prezident Shavkat Mirziyoyev raisligida 2024 yilda makroiqtisodiy barqarorlik va iqtisodiy rivojlanishni ta’minlash bo‘yicha ustuvor vazifalar yuzasidan videoselektor yig‘ilishda ma’lum qilingan.

Yig‘ilishda budjet tushumi uchun eng katta zaxira – yerlarni tadbirkorlarga auksion orqali sotish ekani ta’kidlangan.

«O‘tgan yili bundan 1 trillion so‘m tushum bo‘ldi, 12 mingta yangi loyihalar qo‘shildi. Lekin joylardagi sustkashlik bois, o‘tgan yili 3 trillion so‘m qo‘shimcha tushum boy berildi.

Bosh vazirga yil davomida auksionga umuman yer chiqarmagan Baliqchi, Jalaquduq, Bektemir, Mirobod, Olmazor, Chilonzor, Yunusobod, Yakkasaroy tumanlari hokimlarining lavozimiga loyiqligini hal qilish topshirildi», deyiladi xabarda.

Davaktiv agentligi yerlarni auksionda sotish bo‘yicha 4 trillion so‘mlik rejani tumanbay ishlab chiqishi va ijrosini ta’minlashi belgilandi.

Tumanning master rejasi bo‘lsa, bu juda katta mablag‘, tadbirkorlar va bandlik uchun manba bo‘ladi. Lekin hozirgacha bor-yo‘g‘i 17 ta kichik aholi punktining master rejasi tayyorlandi.

Iqtisodiy kompleks rahbariyatiga yil yakuniga qadar 70 ta, kelasi yili barcha tumanlarning master rejalarini ishlab chiqishga topshiriq berildi.

Ma’lumot uchun:

• Andijon viloyatining Baliqchi tumaniga 2018 yil mayidan buyon Jasur Abdurayimov;
• Andijon viloyatining Jalaquduq tumaniga 2020 yil sentabridan buyon Hikmatullo Latipov;
• Toshkent shahrining Bektemir tumaniga 2021 yil iyulidan buyon Tapil Mahamadziyayev;
• Toshkent shahrining Mirobod tumaniga 2023 yil oktyabridan buyon Anvar Sayfutdinov;
• Toshkent shahrining Olmazor tumaniga 2021 yil avgustidan buyon Azizxon Umarxonov;
• Toshkent shahrining Chilonzor tumaniga 2022 yil avgustidan buyon Saidqahhor Xolxo‘jayev;
• Toshkent shahrining Yunusobod tumaniga 2022 yil yanvaridan buyon Bahodir Abduvaliyev;
• Toshkent shahrining Yakkasaroy tumaniga 2023 yil oktyabridan buyon Nilufar Allabergenova hokimlik qilmoqda.