AQShda o‘smir “Tetris” o‘yinida yangi rekord o‘rnatdi. U 255-darajagacha yetib bordi, shundan so‘ng o‘yin yangidan boshlandi

16 yoshli Maykl Artiaga “Tetris” o‘yinining 255-darajasigacha yetib bordi, shundan so‘ng o‘yin nol darajaga tushib, yangidan boshlandi. Bu haqda BBC xabar bermoqda.

Dam olish kuni o‘smir Nintendo versiyasidan o‘ynab, jarayonni Twitch platformasida jonli efirda ko‘rsatdi. Amerikalik o‘smir dogplayingtetris taxallusi ostida o‘ynagan. U 82 daqiqa ichida 255 ta bosqichni bosib o‘tdi. Nashrning aniqlashtirshicha, o‘yinchi Nintendo Entertainment System (NeS) konsoli uchun yaratilgan o‘yin versiyasidan foydalangan. Bu versiya 155-bosqichdan keyin xatoliklarga yo‘l qo‘ymasligi aytilgandi.

Ma’lum qilinishicha, shu tariqa, bola tarixda “Tetris”ni nol darajaga tushirishga muvaffaq bo‘lgan birinchi odamga aylandi.

“O‘yin tugaganidan juda xursandman. Boshqa hech qachon bu o‘yinni o‘ynashni xohlamayman”, — deya Mayklning so‘zlarini keltirmoqda nashr.

Bunga qadar oklaxomalik 13 yoshli Uillis Gibsonning rekordi ma’lum edi. U 2024 yilning yanvar oyida o‘yinni 157-darajagacha o‘ynagan, shundan so‘ng keyingi dasturiy kod mavjud bo‘lmagani sababli o‘yin to‘xtab qolgan. Bu haqda The New York Times nashrida xabar berilgandi.

“Tetris” o‘yinini 1984 yilda sovet dasturchisi Aleksey Pajitnov yaratgan. Boshqotirma o‘yinda yuqoridan tushayotgan turli shakldagi bloklar to‘g‘ri joylansa, pastki qatorlar asta-sekin yo‘qolib boradi va yangi bloklarga joy ochiladi. Ular ekran yuqorisigacha to‘planib qolsa, o‘yin tugaydi. Bu o‘yin ayniqsa AQSh, Yevropa va Yaponiyada ommalashgan.

Agar o‘yinchi tushayotgan bloklarni to‘g‘ri joylashtira olsa, “Tetris” cheksiz davom etishi mumkinligi taxmin qilinadi. Uzoq vaqt davomida o‘yinning eng so‘nggi bosqichi 29-bosqich deb qaralgan. Biroq so‘nggi yillarda tobora ko‘proq o‘yinchilar undan ham yuqori bosqichlarga o‘tmoqda.