Bosh prokuratura huzuridagi Iqtisodiy jinoyatlarga qarshi kurashish departamenti Navoiy viloyati boshqarmasi xodimlarini aldab, tezkor tadbirdagi pulni olib ketgan yigitlarga sud hukmi o‘qildi.
Kun.uz o‘rgangan sud hujjatida keltirilishicha, 1992 yilda tug‘ilgan J.S. oldin ham bir necha marotaba sudlangan va xavfli retsidivist deb topilgan. Ikkinchi sudlanuvchi Sh.I. esa 1996 yilda tug‘ilgan. Har ikki yigitga nisbatan qamoqqa olish tarzidagi ehtiyot chorasi qo‘llangan.
J.S. 2024 yil 26 iyun kuni departamentning Navoiy viloyat boshqarmasiga ariza bilan murojaat qilgan. U o‘z murojaatida “Feruz” ismli shaxs haydovchilik guvohnomasi olib berish evaziga 700 AQSh dollari talab qilayotganini bildirib, unga nisbatan qonuniy chora ko‘rishni so‘ragan.
J.S.ning murojaat yuzasidan departamentning Navoiy viloyati boshqarmasi tomonidan viloyat IIB xodimlari bilan hamkorlikda tezkor tadbir o‘tkazilgan. Tezkor tadbir davomida arizachi jinoiy sherigi Sh.I. bilan boshqarma maxsus kassasidan protsessual tartibda taqdim qilingan 700 AQSh dollari va maxsus ovoz yozish moslamasini qo‘lga kiritib, voqea joyidan yashiringan. So‘ngra tezkor tadbir uchun berilgan pul mablag‘larini o‘z ehtiyojlari uchun sarflab yuborgan.
J.S. sudda aybiga to‘liq iqrorlik bildirgan.
“2024 yilning aprel-may oylarida Sh.I. bilan tanishib qoldim. Shundan so‘ng u bilan aloqalarim yaxshilanib, bordi-keldi qila boshladim. O‘sha vaqtlarda farzandim kasalligi tufayli Sh.I.dan pul topish bo‘yicha maslahat so‘radim. U departamentning Navoiy viloyati boshqarmasi xodimi S.X. bilan tanishtirib qo‘ydi. Shundan so‘ng, Sh.I. departament bilan aloqasi yaxshi ekanini, departament orqali pulni olish mumkinligini taklif qildi. Departamentning Navoiy viloyati boshqarmasiga ariza bilan murojaat qilib, go‘yoki o‘ylab topilgan shaxs tomonidan undan noqonuniy tarzda pul talab qilgani hamda unga nisbatan qonuniy chora ko‘rilishini so‘rashi haqida yo‘l ko‘rsatdi. U yolg‘ondan audioyozuv qilib departamentga taqdim qilishimni hamda tadbir davomida berilgan pul mablag‘larini olib voqea joyidan ketib qolishimni, shunda departament xodimlari pullarni o‘zlari to‘lashini ma’lum qildi”, degan J.S. o‘z ko‘rsatmasida.
O‘ylangan rejaga asosan J.S. departamentning Navoiy viloyati boshqarmasiga ariza bilan murojaat qilgan. Unga belgilangan tartibda tezkor tadbir uchun 700 AQSh dollari va ovoz yozib olish qurilmasi taqdim qilingan.
Shundan so‘ng departament xodimlari va xolislar ishtirokida belgilangan joyga borganda J.S. telefonini o‘chirib, voqea joyidan yashiringan. Unga tadbir uchun berilgan 700 AQSh dollari va ovoz yozib olish moslamasini o‘zi bilan olib ketgan.
