Trampning Kanada tovarlari uchun va’da qilgan savdo bojlari 4 martdan e’tiboran qisman joriy qilindi. Prezidentga ko‘ra, 2 aprel sanasidan boshlab ham Kanada, ham Meksika uchun boj to‘liq yozila boshlanadi. Kanada bosh vaziri Jastin Tryudo esa buni “urush” deya atadi va “AQSh bizda urush ochdi” deb murojaat yo‘lladi. Kun.uz suhbatlashgan Kanada Konservativ partiyasi a’zosi Obidxon Mamadaliyev fikriga ko‘ra Ottava jim qarab turmaydi.
Donald Tramp ikkinchi marta prezidentlik kursisini egallarkan, o‘zining “eski qo‘shig‘i”ni kuylay boshladi, ya’ni yana asosiy savdo hamkorlari uchun savdo bojlarini belgiladi. Fevral boshidan joriy qilinishi kutilgan bu bojlar Kanada va Meksika uchun kechiktirildi, Xitoyga esa yozila boshlandi. Biroq 4 martdan e’tiboran Kanadadan importning yarmi uchun 25 foizlik yig‘im rasman joriy etilarkan, Tramp shu yilning 2 aprelidan boshlab to‘liq mahsulotlar uchun boj olishini e’lon qildi. Prezident shu kuni kongressga murojaat yo‘llarkan, buni yana bir bor tasdiqladi.
Kanada bosh vaziri Jastin Tryudo esa bunga munosabat bildirarkan, o‘zining g‘azabini yashirmadi.
“AQSh bizga savdo urushini e’lon qildi, biz Amerika xalqiga dushman emasmiz. Amerikaliklar bizning do‘stlarimiz, hamkorlarimiz, qo‘shnilarimiz, biz ulardan darg‘azab emasmiz. Biz Amerika hukumatidan g‘azabdamiz, endi dam olish uchun Floridaga bormaymiz, ularning mahsulotlaridan ham olmaymiz. Hozircha 30 mlrd dollarlik tovarlarga javob bojini joriy qilamiz, 21 kun ichida esa to‘liq Amerikadan importga 25 foiz miqdorida yig‘im yozilishi ta’minlanadi”, - dedi Kanada bosh vaziri.
Kun.uz suhbatlashgan Kanada Konservativ partiyasi a’zosi Obidxon Mamadaliyev fikricha, ikki davlatning bugungacha biror muammosi yoki kelisholmagan masalasi yo‘q edi.
Tramp siyosatchi emas, tadbirkor bo‘lgani bois ham siyosatdagi qimorbozligini hech qanaqasiga tushunib bo‘lmaydi. Bu bir kishining injiqligi xolos”, - deydi yurtdoshimiz.
Hozircha Kanada 30 mlrd dollarlik tovarlar uchun boj joriy qilarkan, keyingi qadamlar shu kunlarda jiddiy muhokamada. Parallel ravishda Jastin Tryudo lavozimini topshirishga tayyorgarlik ko‘rmoqda va yaqinda saylov sanasi belgilanadi. Davlat iqtisodiyoti uchun muhim provinsiya – Ontarioda o‘tkazilgan mahalliy saylovlarda Konservativ partiya 80 foiz ovoz bilan ishonchli g‘alabaga erishgan. Kanadada ham liberallar davri yakuniga yetayotganga o‘xshaydi. Yakshanba, 9 mart kuni Liberallar partiyasi o‘ziga yangi lider saylaydi va saylov kuni ham belgilanishi kutilmoqda.
