Ommaviy tartibsizliklar sodir etish maqsadida o‘quvdan o‘tganlar 7 yilgacha ozodlikdan mahrum qilinishi mumkin

27 mart kuni qabul qilingan qonun bilan Jinoyat kodeksiga o‘zgartirishlar kiritildi. Bu haqda Adliya vazirligi «Huquqiy axborot» kanalida xabar berildi. Xususan, Jinoyat kodeksining 244-moddasiga ommaviy tartibsizliklar sodir etish maqsadida o‘quvdan o‘tganlik hamda ushbu faoliyatni moliyalashtirganlik uchun javobgarlikni belgilovchi o‘zgartirish kiritildi.

Qonunga ko‘ra, shaxsning ommaviy tartibsizliklar sodir etish maqsadida o‘quvdan o‘tishi, shu jumladan ommaviy tartibsizliklarni sodir etish bilimini, amaliy mahoratini va ko‘nikmalarini egallashi, o‘quv chog‘ida qurol-yarog‘, portlatish qurilmalari, portlovchi, zaharlovchi, atrofdagilar uchun xavf tug‘diradigan boshqa moddalar va buyumlar bilan muomala qilish usullarini o‘rganishi:

●     BHMning 300 baravaridan 600 baravarigacha miqdorda jarima yoki 3 yilgacha axloq tuzatish ishlari yoxud 5 yildan 7 yilgacha ozodlikdan mahrum qilish bilan jazolanishi belgilandi.

Shuningdek, ushbu jinoyatni sodir etgan shaxs, agar u o‘quvdan o‘tganligi to‘g‘risida hokimiyat organlariga ixtiyoriy ravishda xabar qilsa, sodir etilgan jinoyatni fosh qilishga yoki bunday o‘quvdan o‘tgan, o‘quvni amalga oshirgan, tashkil etgan yoxud moliyalashtirgan boshqa shaxslarni, shuningdek o‘quv o‘tkazilgan joyni aniqlashga faol ko‘maklashsa va agar uning harakatlarida jinoyatning boshqa tarkibi mavjud bo‘lmasa, jinoiy javobgarlikdan ozod qilinadi.

Qonun rasmiy e’lon qilingan kundan e’tiboran kuchga kiradi. Adliya vazirligi qonunning to‘liq matnini e’lon qilmadi.

2024 yil dekabr oyida Oliy Majlis Qonunchilik palatasi majlisida ushbu qonun haqida bosh prokuror o‘rinbosari Svetlana Ortiqova ma’lumot bergan edi. Ortiqova bu jazo onlayn tarzdagi o‘quvlarda qatnashayotgan shaxslarga ham taalluqli bo‘lishini, bunday o‘quvlarda kimdir bilib, kimdir bilmay qatnashishini aytgandi.