Fransiya mudofaa budjetini tezlashtirilgan sur’atda oshiradi

Rossiya tahdidi ostida Fransiya o‘z armiyasini qayta qurollantirish sur’atlarini tezlashtirishga qaror qildi va shu maqsadda mudofaa uchun muddatidan oldin qo‘shimcha milliardlab yevro ajratmoqda. Bu haqda 13 iyul, yakshanba kuni mamlakat prezidenti Emmanuel Makron ma’lum qildi. Uning so‘zlariga ko‘ra, 2026 yilda Parijda mudofaa uchun qo‘shimcha xarajatlar hajmi 3,5 milliard yevroni, 2027 yilda esa 3 milliard yevroni tashkil qiladi.

«Shunday qilib, 2027 yilda biz mudofaa uchun 64 milliard yevro sarflaymiz. Bu 2017 yilda qurolli kuchlarga mudofaa uchun ajratilgan budjetdan ikki baravar ko‘p», dedi Makron 14 iyulda nishonlanadigan Fransiya milliy bayrami — Bastiliyani egallash kuni arafasida qurolli kuchlarga qilgan an’anaviy murojaati chog‘ida. 

«1945 yilda Ikkinchi jahon urushi tugaganidan beri erkinlikka hech qachon bunchalik tahdid bo‘lmagan», — deya ta’kidladi Emmanuel Makron Rossiyaning Ukrainaga qarshi urushi haqida gapirar ekan. «Qit’amizdagi tinchlik hech qachon bizning hozirgi qarorlarimizga bu qadar bog‘liq bo‘lmagan». Fransiya prezidentining so‘zlariga ko‘ra, tahdidlarga qarshi tura olish uchun Fransiya o‘q-dorilar, dronlar, havo mudofaasi, shuningdek, elektron urush va kosmik qurol tizimlariga ko‘proq sarmoya kiritishi kerak. 

Makron Yevropa davlatlari mudofaa masalasini o‘z qo‘liga olishi va qurol-yarog‘ga birgalikda sarmoya kiritishi kerakligi haqidagi fikrni takrorladi.