Inson sog‘lig‘iga xavf tug‘diradigan holatlarda tekshiruvni xabardor qilish tartibida amalga oshirish mumkin – biznes ombudsman

Kun.uz O‘zbekistonda kosmetologiya sohasi nazoratsiz rivojlanayotgani ortidan ko‘plab muammolar yuzaga kelgani haqida surishtiruv e’lon qilgandi.

Ko‘rsatuvda chiqish qilgan Toshkent shahar Sanitariya-epidemiologik osoyishtalik va jamoat salomatligi boshqarmasi bo‘lim mudiri Dilbar To‘raxo‘jayeva mutaxassislar kosmetologik sub’yektlarni mustaqil tarzda borib tekshira olmasligini aytib o‘tgandi.

«Faqat ariza kelib tushgan hollarda, unda ham aniq faktlar bo‘lsagina, biznes ombudsmandan ruxsat olgandan keyin tekshira olamiz. Kosmetologlar tadbirkorlik sub’yekti sifatida ro‘yxatdan o‘tgani uchun ularning faoliyatiga aralashishimiz mumkin emas – bu qonunda belgilangan», degandi u.

Mazkur holat yuzasidan biznes ombudsman Kun.uz’ga quyidagilarni ma’lum qildi:

2025 yil 1 yanvardan boshlab tadbirkorlik sub’yektlari faoliyatida o‘tkaziladigan tekshiruvlar biznes ombudsmanni «Yagona davlat nazorati» axborot tizimi orqali xabardor qilish tartibida o‘tkazilmoqda, ya’ni tekshiruvlarni biznes ombudsman bilan kelishish tartibi to‘liq bekor qilingan.

Inson sog‘lig‘i va hayotiga xavf tug‘diradigan va shoshilinch aralashuvni talab qiladigan holatlarda tekshiruv boshlanganidan so‘ng 24 soat ichida maxsus platforma orqali xabardor qilish tartibi mavjud.

Tashkilot Dilbar To‘raxo‘jayevaning fikrlariga ham sharh berib o‘tdi:

«Birinchidan, amaldagi qonunchilikka ko‘ra, tadbirkorlar faoliyatida tekshiruv o‘tkazish uchun quyidagi asoslar mavjud:

• «Xavfni tahlil qilish» elektron tizimi natijalari;
• aniq faktlar;
• holatlar bo‘yicha fuqarolarning hayoti va sog‘lig‘iga, jamoat xavfsizligi, atrof-muhitga, jismoniy va yuridik shaxslarning hamda davlat manfaatlariga zarar yetkazish xavfining oldini olish yoki bartaraf etish uchun jismoniy va yuridik shaxslarning murojaatlari, davlat organlari va tashkilotlari ma’lumotlari, ommaviy axborot vositalari va boshqa axborot manbalaridan olingan ma’lumotlar.

Ya’ni noqonuniy faoliyat olib borayotgan tadbirkorlik sub’yektida biznes ombudsman bilan kelishmasdan (ruxsat olmasdan) xabardor qilgan holda tekshiruv o‘tkazish vakolati barcha nazorat qiluvchi organlarda mavjud.

Ikkinchidan, Har bir nazorat qiluvchi organ «Xavfni tahlil qilish» elektron tizimini joriy etishi belgilangan.

«Xavfni tahlil qilish» elektron tizimida tadbirkorlik sub’yektlari faoliyatida huquqbuzarlik sodir etish xavfi past, o‘rta va yuqori darajalarga tasniflanadi. Xavf darajasi o‘rta va yuqori bo‘lgan tadbirkorlik sub’yektlari faoliyatida yuzaga kelishi mumkin bo‘lgan xavflarning oldini olishga qaratilgan profilaktika tadbirlari o‘tkazilishi yoki tekshiruv o‘tkazilishi mumkinligi ko‘zda tutiladi.

Xavf darajasi bo‘yicha mezonlar esa har bir tashkilot tomonidan amaldagi tartib-qoidalardan kelib chiqib belgilanadi va uning shaffofligi tadbirkor faoliyatini xolis baholash imkonini beradi.

Oddiy qilib tushuntiradigan bo‘lsak, amalda Vazirlar Mahkamasi qarori bilan tasdiqlangan 200 dan ortiq SanPin qoidalari mavjud bo‘lib, Sanepidqo‘mita xavf darajasi o‘rta va yuqori bo‘lgan tadbirkorlik sub’yektlarida doimiy ravishda tadbirkorlik sub’yektlarining ushbu talablarga muvofiq ish olib borayotganini tekshirishga haqli» , deyiladi biznes ombudsman izohida.