Narxi arzonlashgani iddao qilingan AI-92 benzini qimmatlashdi

11 avgust kuni “O‘zbekneftgaz” kompaniyasi “AI-92 benzini narxi arzonlashtirildi” degan sarlavhali bayonot bilan chiqqandi.

Bayonotda Buxoro neftni qayta ishlash zavodida ishlab chiqarilgan AI-92 rusumli avtobenzinning birja savdolaridagi boshlang‘ich narxi tonnasiga 12 mln 881 ming so‘mdan 12 mln 628 ming so‘mgacha yoki 2 foizga tushirilgani aytilgan.

“Bu, o‘z navbatida, 1 litr AI-92 markadagi avtobenzinning birjadagi boshlang‘ich narxi 9 400 so‘m degani”, deyiladi kompaniya xabarida.

O‘tgan davr mobaynida birjadagi narxlar 13 avgust kuni 12 mln 991 ming so‘mga ko‘tarilgan bo‘lsa, 22 avgust kuni 12 mln 633 ming so‘mgacha pasaygan. 25 avgust kuni savdolarda esa mahsulotning 1 tonnasi uchun narx 12 mln 855 ming so‘mni tashkil etgan.

Shoxobchalarda esa, narxlar oshdi. Xususan, Mustang va Poytaxt Oil AYoQShlarida iyul oyi o‘rtalaridan beri AI-92 narxi 10 500 so‘mdan 11 300 so‘mgacha yoki 7,6 foizga ko‘tarilgan.

Avvalroq, qator AYoQShlarda AI-80 benzini narxi 9100 so‘mga ko‘tarilgani xabar qilingandi. Bu markadagi benzin ishlab chiqarish yaqin oylarda to‘xtalishi mumkinligini hisobga olsak, avtomobiliga gaz uskunasi qo‘yishni xohlamagan haydovchilarning yoqilg‘i xarajatlari ancha-muncha oshadi.