Chevrolet mashinalariga talab pasaydi, elektromobillar sotuvida o‘sish. O‘zbekiston avtomobil bozori qanday o‘zgaryapti?

Oxirgi yillarda O‘zbekiston avtomobil bozori sezilarli darajada o‘zgarib boryapti. Xususan, «O‘zavtosanoat» taqdim qilgan ma’lumotlarga ko‘ra, 2025 yilning 9 oyida mamlakatdagi rasmiy dilerlar tomonidan 296 ming 331 dona avtomobil sotilgan. Bu o‘tgan yilning mos davriga nisbatan 2,3 foiz yoki 7042 donaga kam. Qisqarish asosan Chevrolet brendiga tegishli modellar bilan yuz beryapti.

Joriy yilning yanvar-sentabr oylarida UzAuto Motors tomonidan taqdim etilgan 10 modeldan 7 tasiga talab pasaygan. Faqatgina Damas, Labo va Malibu sotuvlarida o‘sish kuzatilgan. Malubu’ga talabning oshishi davlat idoralari tomonidan amalga oshirilgan qo‘shimcha xaridlar fonida yuz bergan bo‘lishi mumkin. Umuman olganda, hisobot davrida UzAuto Motors’ning bozordagi ulushi 89,4 foizdan 82,7 foizgacha qisqargan.

Chevrolet brendiga tegishli bo‘lmagan va eng ko‘p sotilgan avtomobil – Kia Sonet. Ushbu modelning savdosi o‘tgan yilning mos davriga nisbatan 4 barobarga oshgan. O‘z navbatida, Kia’ning qimmat modellariga talab sezilarli darajada pasaygani qayd etilgan.

Shuningdek, quyidagi modellar ham o‘zbekistonliklar orasida ommaviylashib boryapti.

Kia, Cherry va Haval avtomobillarini yetkazib beruvchi ADM Jizzakh’ning O‘zbekiston bozoridagi ulushi 6,5 foizdan 11,1 foizga, umumiy sotuvlar hajmi esa 19 766 donadan 32 987 donagacha ko‘paygan.

BYD ham bozordagi ulushini 3,8 foizdan 5,7 foizgacha, sotuvlar hajmini 11 580 donadan 16 846 donagacha oshirgan.