Iqlim uchun kurash: dunyoning 100 dan ortiq mamlakati yoshlari Samarqandda yig‘ildi

Forum YuNeSKO, Madaniyat va san’atni rivojlantirish jamg‘armasi hamda Yoshlar ishlari agentligi hamkorligida tashkil etilmoqda. Uch kunlik tadbirda yoshlarning iqlim o‘zgarishiga qarshi kurashdagi ishtiroki, innovatsion yechimlar va global siyosatda ularning roli muhokama qilinadi.

26 oktyabr kuni ishtirokchilar uchun “Bag‘rikenglik kemasi” xalqaro san’at loyihasi doirasida konsert va madaniy sayohatlar tashkil etildi.

Forumning asosiy qismi “Generation of Action” shiori ostida start oldi. Unda YuNeSKO rahbarlari, O‘zbekiston Respublikasi hukumati vakillari, shuningdek, Nigeriya, Misr, Ispaniya, Boliviya va Braziliyadan yosh iqlim yetakchilari ishtirok etmoqda.

Anjumanda iqlim o‘zgarishining ijtimoiy va iqtisodiy oqibatlari, yoshlarning barqaror rivojlanish va “yashil iqtisodiyot” sohasidagi tashabbuslari, ekota’lim va iqlim savodxonligini oshirish masalalari muhokama etilmoqda. Shuningdek, iqlim inqirozi sharoitida inklyuziv siyosat va gender tengligi masalalari, yoshlar orqali global hamjihatlik va “adolatli o‘tish” g‘oyalarini ilgari surish, iqlim muammolarini yechishda raqamli innovatsiyalar va startaplarning o‘rni haqida fikr almashilmoqda.

28 oktyabr kuni forum ishtirokchilari “Youth Recommendations and Calls to Action” deb nomlangan sessiyada iqlim o‘zgarishiga qarshi kurash va barqaror rivojlanish bo‘yicha o‘z tavsiyalarini ishlab chiqadilar. Bu hujjat keyinchalik YuNeSKO Bosh konferensiyasiga yoshlar tavsiyalari sifatida taqdim etiladi.

Eslatib o‘tamiz, YuNeSKOning 43-Bosh konferensiyasi bu yil ilk bor Parijdan tashqarida - Samarqand shahrida o‘tkazilmoqda. Bu tarixiy qaror orqali O‘zbekiston YuNeSKO bilan hamkorlikni yangi bosqichga olib chiqdi. Yoshlar forumi esa mazkur global anjumanning asosiy qismlaridan biri bo‘lib, mamlakatning xalqaro nufuzini va yoshlar siyosatini mustahkamlashga xizmat qilmoqda.