28 oktyabr kuni Rio-de-Janeyroda shahar tarixidagi eng qonli politsiya amaliyotini o‘tkazdi. Amaliyot chog‘ida kamida 64 kishi halok bo‘ldi, ularning 4 nafari politsiya. Rio shtati hukumati seshanba kungi operatsiyani «Comando Vermelho» — «Qizil qo‘mondonlik»to‘dasiga qarshi tarixdagi eng yirik reyd deb atadi.
Halok bo‘lganlarning qanchasi politsiya nishonidagi to‘da a’zolari, qay qismi esa tasodifan halok bo‘lgan fuqarolar ekani aniq emas.
Rio gubernatori Klaudio Kastro «narko-terroristik tuzilmalarga qarshi qat’iy turamiz», deya bayonot berdi. Uning aytishicha, operatsiya shaharning xalqaro aeroporti yaqinida, kambag‘al va zich aholi yashaydigan hududlar — Rio favelalarida o‘tkazilgan.
Riodagi Alemao va Penha favelalari — dengiz bo‘yidagi tepaliklarda joylashgan kambag‘al va zich aholi yashaydigan hududlar hisoblanadi.
«Seshanba kuni erta tongda osmonni tutun qoplagan — jangarilar zirhli mashinalar harakatini to‘sish uchun avtomobillarni yoqib yuborgan, to‘xtovsiz otishmalar esa shahar manzarasi fonida yangragan», deydi guvohlardan biri Reutersʼga.
Politsiya tarqatgan videolarda gumondorlar politsiyaga qarshi granatalar bilan jihozlangan dronlardan foydalanayotgani aks etgan. Tasvirlarda shuningdek, qurollangan shaxslarning o‘rmonzor tomonga qochib ketayotgani ko‘rsatilgan.
Braziliya rasmiylariga ko‘ra, operatsiyada 2 500 nafar xodim ishtirok etgan va ikki oydan ortiq vaqt davomida rejalashtirilgan.
