Braziliyada narkomafiyaga qarshi operatsiya: deyarli 120 kishi halok bo‘ldi

Braziliya politsiyasi Rio-de-Janeyroda narkomafiyaga qarshi reyd o‘tkazdi, natijada 100 dan ortiq inson vafot etdi. Bu mamlakat tarixidagi eng qonli politsiya operatsiyasi hisoblanmoqda. Braziliya hokimiyati 119 kishining halok bo‘lganini tasdiqladi. Advokatlar ma’lumotiga ko‘ra, halok bo‘lganlar soni 130 dan oshishi mumkin.

“Qizil jamoa” bandasiga qarshi reydlar 28–29 oktyabr kunlari Rio-de-Janeyro shimolidagi Alemao va Penya favelalarida o‘tkazildi. Operatsiyada taxminan 2500 nafar kuchishlatar tuzilmalar xodimlari ishtirok etdi.

Rio-de-Janeyro ma’muriyatining xabar qilishicha, 118 dona qurol, jumladan avtomatlar va portlovchi moddalar musodara qilindi. 113 kishi, shu jumladan 10 nafar o‘smir qo‘lga olindi.

Kelasi hafta Braziliyaning ushbu megapolisida BMT iqlim konferensiyasi doirasida tadbirlar o‘tkazilishi rejalashtirilgan.

Braziliya adliya vaziri Rikardo Levandovski qurbonlar qarindoshlariga hamdardlik bildirdi. Uning so‘zlariga ko‘ra, prezident Luis Inasiu Lula da Silva “qurbonlar sonidan juda qattiq iztirobda”.

BMT bosh kotibi Antoniu Guterrish ham politsiya reydlari oqibatida kelib chiqqan qurbonlar sonidan qattiq xavotir bildirib, Braziliya hokimiyatini inson huquqlariga rioya qilishga va sodir bo‘lgan voqeani tergov qilishga chaqirdi.

Reyd qoralangan bayonotlar bilan o‘nlab huquqni himoya qiluvchi tashkilotlar, jumladan, xalqaro Amnesty International ham chiqish qildi. Mahalliy aholi va advokatlar AFP agentligiga reyd paytida ayrim qo‘lga olinganlar boshiga o‘q uzilib o‘ldirilgani haqida xabar berdi.