Navoiy IIBda 13 nafar xodimga nisbatan xizmat tekshiruvi tayinlandi

Navoiy viloyati IIBning barcha shaxsiy tarkibi ishtirokida o‘tkazilgan yig‘ilishda xizmat intizomi va qonunchilikni mustahkamlash, xodimlar tomonidan salbiy holatlar sodir etilishining oldini olish, ayniqsa korrupsion jinoyatlarga olib keluvchi omillarni o‘z vaqtida aniqlash va bartaraf etish masalalari muhokama qilindi.

Foto: IIV

Yig‘ilishda rahbarlarga qo‘l ostidagi shaxsiy tarkib ustidan kunlik nazoratni kuchaytirish, har bir xodimga individual yondashish, ularning xizmat faoliyati, ijtimoiy-oilaviy ahvoli hamda ruhiy-psixologik holatini inobatga olgan holda vazifa va topshiriqlar berish zarurligi ta’kidlandi. Shuningdek, har bir rahbar o‘z qo‘l ostidagi xodimlar faoliyati uchun javobgar ekani qayd etildi.

Ma’lum qilinishicha, joriy yilning 10 oyi mobaynida xodimlar tomonidan 93 ta turli ko‘rinishdagi salbiy holat sodir etilgan bo‘lib, natijada 10 nafar xodim ichki ishlar organlari safidan chetlatilgan.

Yig‘ilish davomida esa salbiy harakatlari aniqlangan 13 nafar xodimga nisbatan xizmat tekshiruvi o‘tkazilishi tayinlandi.

Bundan tashqari, ichki ishlar organlarini xalqchil va professional tuzilmaga aylantirish bo‘yicha ishlar samaradorligini oshirish, xodimlarning jangovar va jismoniy shayligi hamda bilim darajasini yanada yuksaltirish maqsadida qator chora-tadbirlar belgilangan.