Istanbulda bolalar uyiga joylashtirilgan voyaga yetmagan o‘zbekistonlik vatanga qaytarildi

O‘zbekistonning Istanbul shahridagi Bosh konsulxonasi, elchixona hamda Migratsiya va Ijtimoiy himoya milliy agentliklari hamkorligida onasi vafotidan so‘ng ota-ona qaramog‘isiz qolib ketgan va Turkiyadagi bolalar uyiga joylashtirilgan voyaga yetmagan O‘zbekiston fuqarosi vatanga qaytarildi. Bu haqda “Dunyo” AA xabar berdi.

Ma’lum qilinishicha, Turkiyadagi vatandosh mahalliy shifoxonalardan birida farzandli bo‘lgan, biroq ko‘p o‘tmay kasallik tufayli vafot etgan. Shundan so‘ng chaqaloq bir necha yil davomida suriyalik va o‘zbekistonlik ayollar tomonidan parvarish qilingan.

Bir muddatdan keyin ota-ona qarmog‘isiz qolgan bola xolasiga topshirilgan. Ammo bolaning tug‘ilganlik bo‘yicha hech qanday hujjati bo‘lmagani sababli u davlat tomonidan majburiy ravishda Istanbul shahridagi bolalar uyiga joylashtirilgan.

Xolaning bolani vasiy sifatida o‘z qarmog‘iga olish talabi hujjatlar yo‘qligi sabab bolalar uyi ma’muriyati tomonidan rad etilgan. Keyinchalik Bosh konsulxona va Elchixona tomonidan tegishli idoralar bilan olib borilgan muzokaralar hamda advokatlar jalb etilgan holda Turkiya sudi bolani xolasi qarmog‘iga o‘tkazish bo‘yicha qaror chiqargan.

Muammoli masalalar hal etilgandan so‘ng, yurtdoshlarimiz uchun “Vatanga qaytish guvohnomasi” rasmiylashtirilib, ular O‘zbekistonga qaytarilgan.

Ijtimoiy himoya milliy agentligi vakillari bolaning yashashi, ta’lim-tarbiyasi va manfaatlari qonunchilik doirasida belgilangan tartibda ta’minlanishini ma’lum qildi.