Rossiya aviakompaniyalari Kubaga parvozlarni vaqtincha to‘xtatdi

“Rossiya” aviakompaniyasi va Nordwind 11 fevral, chorshanba kuni Kubaga parvozlarni yonilg‘i quydirish bilan bog‘liq muammolar tufayli vaqtincha to‘xtatishini ma’lum qildi. Bayonotga ko‘ra, “Rossiya” (u “Aeroflot” guruhiga kiradi) yaqin bir necha kun ichida Kuba aeroportlaridan rossiyalik sayyohlarni olib chiqish uchun bir nechta maxsus reyslarni amalga oshiradi. Turoperatorlar baholashicha, hozir Kubada taxminan 4000 nafar rossiyalik bor.

Bundan oldin energiya inqirozi sabab Kubaga parvozlarni boshqa xalqaro aviakompaniyalar ham to‘xtatgan edi. Oy boshida Kuba hukumati 9 fevraldan boshlab xorijiy samolyotlarni yonilg‘i bilan ta’minlay olmasligini ma’lum qildi — bunga AQSh yanvar oxirida joriy etgan neft blokadasi sabab bo‘ldi.

AQSh prezidenti Donald Tramp Kubaga neft yetkazib berayotgan davlatlarga qarshi qo‘shimcha bojlar kiritish bilan tahdid qildi. Oq uy Kuba hukumati AQSh milliy xavfsizligiga tahdid solmoqda va “do‘st bo‘lmagan davlatlar” bilan hamkorlik qilmoqda, deb hisoblaydi. Tramp shuningdek, uning fikricha, Venesueladan neft yetkazib berish to‘xtaganidan keyin Kuba “kollapsga yaqinlashgan va qulash ostonasida” turganini aytdi.

Ko‘p yillar davomida Kubaga neftning asosiy yetkazib beruvchisi Venesuela bo‘lgan. Eksport esa AQSh 2025 yil dekabrda Venesuelaga nisbatan dengiz blokadasini joriy etgani ortidan to‘xtab qoldi. Venesuela nefti yuklangan oxirgi tanker Kubaga dekabr o‘rtasida yuborilgan.

Energetik inqiroz sharoitida Havanadagi hukumat qat’iy tejamkorlik choralarini qabul qildi. Mamlakat hukumati poyezd va avtobus reyslarining bir qismini bekor qildi, davlat muassasalarini esa to‘rt kunlik ish haftasiga o‘tkazdi. Maktablar va universitetlar mashg‘ulotlar sonini keskin qisqartirdi, ko‘plab mehmonxonalar yopildi.

Reuters agentligi ma’lumotlariga ko‘ra, Kuba kerakli yonilg‘ining umumiy hajmidan faqat uchdan bir qismini mustaqil ishlab chiqara oladi. Mamlakat hukumati samolyotlar Kuba aeroportlarida kamida kelgusi bir oy davomida yonilg‘i quydirolmasligini taxmin qilmoqda.