Qoʻshimcha funksionallar
-
Tungi ko‘rinish
“Kichkina jarima bilan qutulib ketdik” - YPXga bo‘ysunmagan BMW'dagi shaxs qoidabuzarligidan faxrlanishini aytdi
“Kimdir bu narsaning orqasidan 15 sutkaga kirib ketadi, lekin biz kichkina jarima bilan qutulib qoldik”, dedi u. Asadbek Jumayev tanish-bilishlari ko‘pligiga ishora qilib, takror-takror qilmishidan faxrlanishiga urg‘u berdi. Bu intervyu jazo muqarrarligi haqida keskin savollarni uyg‘otmoqda. Katta rezonansdan keyin, YHXB 1,5 oy avvalgi voqea uchun BMW'ni jarima maydoniga endigina joylashning uddasidan chiqdi.
Voqea videosi va Asadbek Jumayevning intervyusidan kadrlar
Toshkent shahrida YPX xodimlarining to‘xtash ishorasiga bo‘ysunmagan ikkita BMW voqeasi ishtirokchilaridan biri bu qilmishidan faxrlanishini aytdi.
Bu shaxs – avtomobillarni tyuning qilish bilan shug‘ullanadigan Uzbelas Performance avtoservisi xodimi Asadbek Jumayev bo‘lib, u boshqalar “15 sutkaga kirib ketishi” mumkin bo‘lgan harakati uchun “kichkina jarima” bilan qutulib qolganini aytib maqtandi va tanish-bilishlari ko‘pligiga ishora qildi.
Yanvardagi voqea
2026 yil yanvar oyi boshida Toshkent shahri Shahrisabz ko‘chasida ikkita BMW avtomobili YPX xodimlarining to‘xtash ishorasiga bo‘ysunmasdan harakatlangani aks etgan video tarqalgan edi. Ikkala mashinada ham davlat raqam belgisi bo‘lmagan, ikkala mashinaga ham qo‘shimcha jihozlar o‘rnatilgan. Ulardan biri tezlikda o‘tib ketgan, ikkinchisi esa sekinlashib, so‘ngra xodimlarga bo‘ysunmay harakatni davom ettirgan.
O‘shanda Yo‘l harakati xavfsizligi xizmati Kun.uz'ga bergan izohida BMW'lardan biri topilib, jarimaga maydonchasiga joylashtirilgani, ikkinchi avtomobil esa qidiruvda ekanini ma’lum qilgandi.
“Baribir faxrlanaman”
Ma’lum bo‘lishicha, o‘sha voqea ishtirokchilaridan biri – Uzbelas Performance avtoservisi xodimi Asadbek Jumayev bo‘lgan. U bloger Malik Muhamedovga bergan intervyusida o‘sha qoidabuzarligiga izoh bergan.
Jumayevning so‘zlariga ko‘ra, bunday qilmish uchun boshqa odamni 15 sutkaga qamashlari mumkin edi, u esa “kichkina jarima” – 10 BHM (4 mln 120 ming so‘m) bilan qutulib ketgan:
“O‘sha hodisa bo‘lgandan keyin qidiruvdan “rezko” buyoqqa kelishgan, kameralarni ochib ber deyishgan. “K sojaleniyu”, man kamerani ochib bermaganman. Shuning evaziga mani “GUVD”ga olib ketishgan, “pokazaniye” berdirtirishgan. Bu narsani butun O‘zbekiston gapirdi. Kimdir bu narsaning orqasidan 15 sutkaga kirib ketoladi, no biza kichkina shtraf bilan “otdelatsya” qildik. V razmere desyati minimal”.
U intervyu oluvchining: “Bunaqa ishni qilish uchun odamda tanish-bilishlari, tankasi bo‘lishi kerak”, degan fikriga qo‘shilishini bildirgan:
“Da. Bitta frazani aytaman, Uzbelas Performance ham shuning evaziga ko‘tarilgan: Ne imey sto rubley, a imey sto druzey”.
“2-3 yildan keyin shu videoni ko‘rsangiz, sizda qanaqa reaksiya bo‘ladi?” degan savolga javoban Asadbek qilmishidan faxrlanishini aytgan:
“Baribir faxrlanaman. Baribir faxrlanaman... Da, mojyet byt, biza yaxshi ish qilmadik, no baribir faxrlanaman. Chunki, kak minimum, my jivyom svoyu jizn, kotoruyu zapomnim”.
Intervyu internetda tarqalgach, ko‘plab jamoatchilik faollari jazo muqarrarligini ta’minlash masalasida rasmiylarni tanqid qila boshladi.
Avtomashina hibsda
Yuqoridagi video tarqalganidan keyin, 25 fevral tushdan keyin Toshkent shahar YHXB Uzbelas Performance avtoservisi oldida BMW avtomobili evakuatorga ortilayotgani aks etgan videoni e’lon qildi.
“Ushbu BMW rusumli transport vositasini tegishli hujjatlarsiz, davlat raqami belgilarisiz boshqargan haydovchi aniqlanib, hozirda qonuniy chora ko‘rilmoqda. Hurmatli yurtdoshlar, transport vositasining kalitini begona shaxslarga topshirmang”, – degan YPX xodimi videodagi izohida.
Haydovchiga qanday chora ko‘rilgani hozircha ma’lum emas.
25 fevral kungi YTH
25 fevral kuni Toshkent shahrining Mirobod tumanida BMW M4 rusumli avtomobil YPX inspektorini urib yubordi. Avtomobil rulida xususiy maktabning 10-sinfida o‘quvchi, haydovchilik guvohnomasi yo‘q 16 yoshli o‘smir bo‘lgan.
Bosh prokuraturaga ko‘ra, holat yuzasidan tergovga qadar tekshiruv olib borilmoqda. Ichki ishlar vazirligi urib ketilgan YPX xodimining vafot etgani haqidagi mish-mishlarni rad etdi.
26 fevral kuni Asadbek Jumayev bu voqeaga aloqasi yo‘qligini aytib chiqdi. “Man kecha butun kun ishxonada bo‘lganman, bu narsaga “voobshche” mani aloqam yo‘q”, degan u Instagram'ga joylagan videosida.
Jumayev postning izohlar qismida YTHda gumonlanayotgan o‘smir uning tanishi ekanini tasdiqlagan. “Bir yarim oy oldin gaplashmay qo‘yganmiz, tekshirsangiz bo‘ladi, mandan “otpiska” qilgan oldindan”, deya yozgan u.
Guvohnomasiz avtomobil boshqarish holatlari juda ko‘p
Poytaxt YHXBga ko‘ra, 27 fevralga o‘tar kechasi shaharda “kuchaytirilgan reyd tadbirlari” o‘tkazilgan. Unda, jumladan, 01 W 077 ZC raqamli Mercedes avtomobili haydovchisining haydovchilik guvohnomasi yo‘qligi aniqlangan.
Guvohnomasiz rulga o‘tirgan boshqa bir haydovchi esa (videoda avtomobil rusumi ko‘rinmagan) xuddi shunday qilmish bilan kamida uchinchi marta qo‘lga tushgan: u 2024 va 2025 yillarda ham haydovchilik guvohnomasisiz avtomobil boshqargani uchun javobgarlikka tortilgan bo‘lgan.
Eslatib o‘tamiz, 25 fevral kuni Toshkentda yuqorida aytilganidan boshqa BMW ishtirokida ham YTH sodir bo‘ldi: BMW va Onix to‘qnashuvi oqibatida Onix'dagi 3 kishi jarohatlangan. Hodisa sabablariga aniqlik kiritilmoqda.
Mavzuga oid
10:47
Xorazmda mast holda mashina boshqargan IIB xodimi odam urib yuborib, hodisa joyidan ketib qoldi
10:35
YPX xodimi urib ketilgan BMW'da o‘nlab qoidabuzarliklar sodir etilgan - IIBB
16:49 / 26.02.2026
Toshkentda BMW rulidagi o‘smir YPX xodimini urib yubordi
15:05 / 26.02.2026