Trampning kompaniyasi kriptovalutada 405 mln dollar yo‘qotdi

Trump Media kompaniyasining 2025 yilda kriptovalutaga kiritgan investitsiyalari birinchi chorakda ko‘pmillionlik zarar keltirdi. Tramp ushbu kompaniyaning 53 foiz aksiyasiga egalik qiladi.

Foto: AP

Truth Social ijtimoiy tarmog‘iga egalik qiluvchi va AQSh prezidenti Donald Tramp oilasi tomonidan nazorat qilinuvchi Trump Media & Technology Group Corp. kompaniyasi hisobotiga ko‘ra, 2026 yilning birinchi choragida kriptovaluta bo‘yicha realizatsiya qilinmagan zararlar sababli daromadlar 405,9 million dollarga kamaygani qayd etilgan.

Kompaniyaning o‘tgan yili kriptovalutaga investitsiya kiritishi ko‘pmillionlik zararga olib kelgan. Buning qariyb 370 mln dollari raqamli aktivlar va aksiyalar bo‘yicha bajarilmagan majburiyatlarga to‘g‘ri keladi.

CoinGecko ma’lumotiga ko‘ra, hozirda Trump Media hisobida o‘tgan yil iyulida 108,5 ming dollardan sotib olingan 9500dan ortiq bitkoyn bor. Kompaniya fevral oxirida 2000 bitkoynni sotdi. O‘shanda uning narxi 70 ming dollardan sal arzon edi. Hozirda bir bitkoyn narxi 80 ming dollardan ortiqroqni tashkil etmoqda.

Aprel oxirida Trump Media bosh direktori Devin Nunyyes kompaniya aksiyalari narxi 2022 yildan beri 90 foizdan ortiqroqqa tushib ketgani bois iste’foga chiqqandi. O‘sha paytda aksiya narxi 97 dollardan balandroq bo‘lgan, hozirda esa 8,93 dollarga teng.

O‘tgan yil noyabrida bitkoyn narxining keskin qulashi ortidan Trump Media 400 mln dollar yo‘qotgandi.

Tramp Trump Media kompaniyasining 53 foiz aksiyasiga ega yirik aksiyadori hisoblanadi.