Toshkent chekkasidagi zapravkada portlash: 3 kishi jarohatlandi

Toshkent viloyatining Zangiota tumanida joylashgan avtomobillarga propan gaz to‘ldirish shoxobchasida portlash ro‘y berdi.

Ijtimoiy tarmoqlarda tarqalgan videolarda «Solnechniy» atrofidagi yo‘lda kuchli portlashdan keyin atrof yorishib ketgani, shundan keyin hodisa joyida yong‘in boshlanganini ko‘rish mumkin.

Favqulodda vaziyatlar boshqarmasi holat yuzasidan izoh berib, 16 iyul kuni soat 22:46 da M-39 avtomobil yo‘li bo‘yida joylashgan shoxobchadagi propan saqlash sig‘imi hamda gaz tashishga mo‘ljallangan maxsus avtomobilda chaqnash ro‘y berganini ma’lum qildi.

Qutqaruv bo‘linmalari voqea joyiga yetib borib, soat 00:04 da yong‘inni bartaraf etgan.

Dastlabki ma’lumotlarga ko‘ra, hodisa oqibatida 3 kishi tan jarohati olgan. Ular zudlik bilan shifoxonaga yuborilib, tez tibbiy yordam xodimlari tomonidan tibbiy muolajalar ko‘rsatilmoqda.