Rossiyaning Kiyevga yopirilma hujumi – fotosuratlar

Rossiyalik harbiylar 1 avgustga o‘tar kechasi va tongda Kiyevni dronlar va raketalar bilan o‘qqa tutdi.

Shahar meri Vitaliy Klichko bergan so‘nggi ma’lumotlarga ko‘ra, hujum oqibatida to‘qqiz kishi halok bo‘lib, 30 dan ortiq kishi yaralangan, shundan 17 nafari shifoxonaga yotqizilgan.

Shaharning yettita rayonida yong‘in va vayrongarchiliklar qayd etilgan. Xususan, Litvaning Ukrainadagi elchixonasi binosi ham zarba vaqtida shikastlangan, diplomatik idora xodimlari orasida tan jarohati olganlar yo‘q. Litva TIV RF maxsus vakilini chaqirtirgan, unga norozilik notasi topshirilgan.

Ukraina prezidenti Volodimir Zelenskiy ma’lum qilishicha, tunda mamlakat hududiga jami 27 ta ballistik raketa uchirilgan – ukrain harbiylari shundan faqat bittasini urib tushira olgan. U buni Patriot tizimlari uchun tutib oluvchi raketalar qolmagani bilan izohlagan. «Aynan ballistikaga qarshi tutib olgichlarning bunday taqchilligi Rossiyani shunday zarbalar uchun rag‘batlantirmoqda», – degan Zelenskiy.

Shu fonda Zelenskiy ittifoqchilarni Ukrainaga Patriot tizimlari uchun ko‘proq raketa berishga chaqirgan. «Ballistikaga qarshi [yordamning] har bir paketi odamlarimiz hayotini asrab qoladi. U yo‘qligida har tunda qurbonlar bo‘laveradi», – deya qayd etgan u.

Ukraina hukumati muntazam ravishda Rossiyaning ballistik hujumlarini qaytarish uchun zarur bo‘lgan raketalar yo‘qligi haqida aytib kelmoqda. Kiyevdagilar bu masala qishgacha hal qilinmasa, Rossiya energetika infratuzilmasiga zarbalarni sezilarli darajada kuchaytirishi, bu esa yirik shaharlarni sovuq kunlarda elektr va issiqlik ta’minotisiz qoldirishidan xavotirda.

Iyul oyi boshida AQSh prezidenti Donald Tramp Anqarada Zelenskiy bilan uchrashuvda Ukrainaga Patriot raketalari ishlab chiqarish uchun litsenziya berishga va’da bergandi. Biroq 30 iyul kuni AQSh prezidenti litsenziya berilishiga «ishonchi komil emasligi» va hali ham bu masalani «ko‘rib chiqayotgani»ni aytdi.

28 iyul kuni Oq uyda bo‘lib o‘tgan muzokaralarda Zelenskiy Trampdan qishgacha Ukrainaga 300 ta Patriot raketasini topshirishni ham so‘ragandi. The Atlantic nashri manbalariga ko‘ra, AQSh prezidenti rad javobini bergan. Eron bilan urushning dastlabki haftalarida bunday raketalar juda ko‘p ishlatib yuborilgani tufayli hozirda AQShning o‘zida ham bunday raketalar zaxirasi yetarli emas.