2026/27 o‘quv yilidan abituriyentlarga oltinchi ta’lim yo‘nalishini tanlash imkoniyati ham beriladi. Bu amaliyotni keyingi haftadan boshlash rejalashtirilgan.
Oliy ta’lim muassasalariga qabulning yakuniy natijalari e’lon qilindi. 18-avgust kuni Oliy ta’lim va innovatsiyalar vazirligi o‘tkazgan matbuot anjumanida qabul natijalari, o‘tish ballari, sertifikat va imtiyozlar, yotoqxona masalasi hamda kelgusidagi o‘zgarishlar haqida ma’lumot berildi. Kun.uz anjumanda yangragan eng muhim raqam va yangiliklarni keltirib o‘tadi.
Joriy yilda davlat granti bo‘yicha o‘rtacha o‘tish bali 134,6 ball, to‘lov-kontrakt asosida esa 93,7 ballni tashkil etdi. O‘tgan o‘quv yilida bu ko‘rsatkichlar mos ravishda 121,8 va 84,9 ball bo‘lgan.
Qabul jarayonida sertifikatga ega abituriyentlar soni ham sezilarli bo‘lgan. Joriy yilda 193 ming nafar abituriyent umumta’lim fanlari, yana 125 ming nafari chet tillari bo‘yicha milliy yoki xalqaro sertifikatga ega bo‘lgan.
Vazirlik vakili kelgusida sertifikatga ega abituriyentlarga maksimal ball berish tartibi qayta ko‘rib chiqilishi mumkinligini bildirdi.
Oltinchi yo‘nalish ochiladi
2026/27 o‘quv yilidan abituriyentlarga oltinchi ta’lim yo‘nalishini tanlash imkoniyati ham beriladi. Ushbu amaliyotni avgust oyining keyingi haftasidan boshlash rejalashtirilgan.
“Oltinchi yo‘nalishda qayerda vakant qolgan bo‘lsa va bu yo‘nalish abituriyentning fanlar majmuasiga mos bo‘lsa – tanlash imkoniyati ochib beriladi. Buni keyingi haftaga reja qilyapmiz”, - dedi vazir o‘rinbosari Sardor Rajabov.
Abituriyentlar bilimi oshdi
Joriy o‘quv yilida minimal o‘tish balli (maksimal ballning 30 foizi) – 56,7 balldan kam natija to‘plagan abituriyentlar 233 935 nafarni, ya’ni jami abituriyentlarning 37,54 foizini tashkil etdi. Bu ko‘rsatkich so‘nggi yillarda izchil pasayib bormoqda. Shu bilan birga, so‘nggi yillarda OTMga hujjat topshirayotganlar soni ham sezilarli qisqargan.
O‘qishdan chetlashtirish ko‘paydi
Vazirlik matbuot anjumanida talabalarning o‘qishdan chetlashtirilishi bilan bog‘liq masalaga ham to‘xtaldi. Vazirlik vakiliga ko‘ra, kelgusida o‘qishdan chetlashtirilgan talabalar statistikasi yuritilishi, shuningdek, “Bitiruvchi sifati indeksi” orqali ta’lim tizimi samaradorligini baholash rejalashtirilmoqda.
Yotoqxonada yashaydigan talabalar yaxshiroq o‘qishi aniqlandi
Vazirlik o‘tkazgan tahlilda talabalar turar joyida yashaydigan talabalar o‘z uyida yoki ijarada yashaydiganlarga nisbatan yaxshiroq o‘zlashtirishi ma’lum bo‘lgan.
Shuningdek, sertifikat bilan o‘qishga kirgan talabalarning o‘zlashtirishi ham tahlil qilingan. Unga ko‘ra, ularning 60 foizga yaqini a’lo baholarga, 40 foizga yaqini yaxshi baholarga o‘qiyotgani ma’lum bo‘lgan.
Imtiyoz asosida qabul qilingan talabalar orasida esa xotin-qizlarga berilgan imtiyozlar asosida o‘qishga kirganlar yuqori natija ko‘rsatayotgani aytildi.
OTMlarga berilgan akademik va moliyaviy mustaqillik tufayli joriy yilda kontrakt va superkontrakt miqdorlarini oliy ta’lim muassasalarining o‘zi belgilaydi.
Superkontrakt asosida o‘qishni rejalashtirayotgan abituriyentlar o‘quv yili boshlanishi bilanoq darslarda ishtirok etishlari mumkinligi ma’lum qilindi.
1-kurs talabalari uchun darslar 7 sentyabrdan, yuqori kurslar uchun 14 sentyabrdan boshlanadi
