Urganch davlat universitetida talabalar uchun oxirgi bir necha oy ichida ikkinchi marta yangi forma talabi joriy etilmoqda.
Kun.uz'ga kelib tushgan audioda oliygoh mas’ullaridan biri ekani aytilgan shaxs talabalarga yangi forma masalasida ko‘rsatma bergan.
“Universitetimiz “jensoveti” (xotin-qizlar qo‘mitasi – tahr.) forma rasmlarini tashlabdi. O‘g‘il bolalar to‘q ko‘k rangli kostyum-shim, qizlar yubka-koftadan ikki variantdan birini tanlab tiktirishi shart. Boshqa muhokama, “men oldim, men qo‘ydim, nima qilay?” degan gaplar bo‘lmaydi. Universitet talabi qo‘yildimi – bajarishga majburmiz. Bugundan harakatni qiling, shu formani tiktirib kiyasizlar”, – deyiladi audioda.
Shuningdek, universitet guruhlarida o‘qituvchi-tyutorlarga talabalarning kiyim o‘lchamlarini yig‘ish bo‘yicha topshiriq berilgani aytilmoqda.
Manbaga ko‘ra, joriy yil aprel–may oylarida ham UrDU talabalari uchun yangi forma joriy qilingan. Unda adras matoli forma talab qilingan bo‘lsa, oradan bir necha oy o‘tib, yangi o‘quv yili arafasida yana boshqa – ko‘k va oq rangli forma xarid qilish talabi qo‘yilyapti.
Forma – tartib masalasimi yoki ortiqcha xarajat?
O‘zbekiston oliy ta’lim tizimida talabalarning formasi masalasi uzoq yillardan beri bahs va muhokamalar markazida bo‘lib keladi.
Ikki yil oldin Toshkent davlat pedagogika universitetida dekan o‘rinbosari talab qilingan dizayndagi formani sotib olish va kiyish bo‘yicha talabalarga bosim o‘tkazgan edi.
O‘tgan o‘quv yilida esa Jurnalistlika va ommaviy kommunikatsiyalar universitetida bir guruh talabalar formasi yo‘qligi uchun darsga kiritilmagani aytilgan, ma’muriyat esa ular darsga kechikib kelgani sababli oliygohga qo‘yilmaganini bildirgandi.
Mazkur muhokamalarda Oliy ta’lim vazirligi so‘nggi yillarda mudom bir fikrni aytib keladi: talabalarning kiyinishi yuzasidan har bir OTM o‘z ichki tartib-qoidalaridan kelib chiqib talab belgilashga haqli.
Shu bilan birga, vazirlik tomonidan talabalar formasi bo‘yicha OTMlarga talab qo‘yilmasligini aytib keladi.
Biroq bu yerda boshqa savol paydo bo‘ladi: ichki tartibda kiyinish talabini belgilash bilan talabalarga muayyan modeldagi yangi kiyimni (ba’zan qisqa muddatlarda qayta-qayta) tiktirish majburiyatidan qanday manfaat bor? Qolaversa, bunday forma kim tomonidan tanlangani, uning narxi qancha ekani, talabalarga muqobil variantlar berilgan-berilmagani va avvalgi formani olgan talabalarning yangi formaga yana xarajat qilish zarurati qanday asoslangani ham ochiq qolyapti.
Ta’lim maskanimi yoki diplom fabrikasi: oliy ta’limda bugun standartlar qanday?
