Vazirlar Mahkamasining 450-son qarori bilan kasbiy taʼlim tashkilotlari oʻquvchilarining oʻqishini koʻchirish yoki qayta tiklash hamda umumiy oʻrta taʼlim tashkilotlarining 10-sinf oʻquvchilari oʻqishini texnikumlarga koʻchirish boʻyicha davlat xizmatlarini koʻrsatish maʼmuriy reglamenti tasdiqlandi.
Qarorga muvofiq, kasbiy taʼlim tashkilotlari oʻquvchilarining oʻqishini boshqa taʼlim tashkilotiga koʻchirish yoki qayta tiklash boʻyicha davlat xizmatlarini koʻrsatishning yagona tartibi belgilanadi.
Yangi tartibning muhim jihatlaridan biri - umumtaʼlim maktablarining 10-sinfida tahsil olayotgan oʻquvchilarga oʻqishini texnikumlarga koʻchirish imkoniyati yaratilishidir. Bu jarayon uchun alohida tartib belgilanadi.
Davlat xizmatidan foydalanish uchun arizalar Davlat xizmatlari markazlari yoki Yagona interaktiv davlat xizmatlari portali (YAIDXP) orqali elektron shaklda topshiriladi.
Shuningdek, kasbiy taʼlim tashkilotlariga oʻqishni koʻchirish va qayta tiklash boʻyicha xulosa berishning yagona mexanizmi joriy qilinadi.
Raqamli texnologiyalar vazirligi bilan hamkorlikda ikki oy muddatda mazkur davlat xizmatlarini YAIDXP orqali toʻliq koʻrsatish imkoniyatini yoʻlga qoʻyish belgilangan.
Yangi tartib 10-sinf oʻquvchilariga umumiy oʻrta taʼlimdan kasbiy taʼlimga oʻtish va muayan kasb yoki mutaxassislik boʻyicha taʼlim olish imkoniyatlarini kengaytiradi.
