Buyuk Britaniyaning Heritage Daily ilmiy onlayn-nashri Samarqand viloyatida aniqlangan noyob arxeologik topilmalarga bagʻishlangan ikkita maqola eʼlon qildi. Bu haqda «Dunyo» axborot agentligi xabar berdi.
Nashrning «Bronza bezaklar Oʻzbekistonda topilgan qadimiy qabr sirini ochishga yordam beradi» nomli maqolasida Payariq tumanida tasodifan aniqlangan qabr haqida maʼlumot berilgan.
Qayd etilishicha, yer ishlari davomida mahalliy aholi vakili odam suyaklari, bronzadan yasalgan bilakuzuklar hamda mayda munchoqlarni topgan.
Ayniqsa, bilakuzuklarning shakli mutaxassislar eʼtiborini tortgan. Ular uchi konussimon boʻlib, spiralsimon naqshlar bilan bezatilgan.
Arxeologlarning dastlabki baholashiga koʻra, topilmalar Zarafshon vodiysi hududida avval aniqlangan soʻnggi bronza davri materiallariga oʻxshash. Shu asosda ular miloddan avvalgi XIII–X asrlarga oid boʻlishi mumkinligi aytilmoqda.
Heritage Dailyʼning ikkinchi maqolasi Urgut tumanidagi ilk oʻrta asrlarga oid Qoʻrgʻontepa arxeologik majmuasida olib borilayotgan tadqiqotlarga bagʻishlangan.
Qazish ishlari paytida arxeologlar qadimiy ibodatxona xarobalari orasidan ganchdan yasalgan haykalning bosh qismini topgan.
Mutaxassislar uchun ushbu topilmaning ikonografiyasi alohida ahamiyat kasb etadi. Chunki Qoʻrgʻontepada bundan avval toʻrt qoʻlli maʼbud tasvirlangan devoriy rasmlar ham aniqlangan.
Yangi topilma Soʻgʻd sanʼati, oʻsha davr diniy tasavvurlari va ibodatxona madaniyatini oʻrganish uchun qoʻshimcha maʼlumot berishi kutilmoqda.
Britaniya nashri Payariqdagi qadimiy qabr va Qoʻrgʻontepadagi topilmalar turli tarixiy davrlarga tegishli ekaniga eʼtibor qaratgan. Birinchisi soʻnggi bronza davriga, ikkinchisi esa ilk oʻrta asrlarga oid.
Heritage Daily xulosasiga koʻra, Oʻzbekiston hududida bronza davridan ilk oʻrta asrlargacha boʻlgan yodgorliklarning muntazam aniqlanayotgani mamlakatning boy tarixiy va madaniy merosini oʻrganish uchun katta salohiyat mavjudligini koʻrsatadi.
