Bir kunda 5 ta oltin. Oʻzbekiston Osiyo oʻyinlarida kuchli beshlikka kirib oldi

Bronza

• Arina Tanatmisheva va Yekaterina Shubina (K2 500 metr)

Shuningdek, oʻq otish, sport gimnastikasi, yengil atletika va qilichbozlik boʻyicha oltin va kumush medallar qoʻlga kiritildi.

Sport gimnastikasi

Sport gimnastikasi boʻyicha Oʻzbekiston jamoasi aʼzosi Oʻtkirbek Joʻrayev ham delegatsiyaga navbatdagi oltin medalni taqdim qildi. Dastakli ot mashqida ishtirok etgan ushbu sportchi 14.733 ball bilan eng yaxshi natijani qayd etdi. Oʻz navbatida, Ravshan Komiljonov soʻnggi pogʻonani egalladi.

Tayanib sakrash boʻyicha musobaqada qatnashgan 51 yoshli Oksana Chusovitina uchun esa bu safargi turnir muvaffaqiyatsiz yakunlandi. U finalda sakkiz sportchi orasida beshinchi natijani qayd etdi.

Oʻq otish

Pnevmatik toʻpponchadan 10 metrdan otish dasturida qatnashgan Vladimir Svechnikov Osiyo oʻyinlari oltin medalini qoʻlga kiritdi. U 244,3 ochko bilan Osiyo oʻyinlari rekordini ham yangilagan.

Milliy olimpiya qoʻmitasi qayd etishicha, bu – oʻq otish sporti turlarida Osiyo oʻyinlarida 32 yillik tanaffusdan keyin qoʻlga kiritilgan oltin medal boʻldi.

Sodiqjon Abdullayev va Muhammad Kamalov esa saralash bahslaridan finalga chiqa olmagan. Ular mos ravishda 18 va 30-oʻrinlarni band etishgan.

Yengil atletika

Yengil atletika boʻyicha Oʻzbekiston jamoasi sharafini himoya qilgan Sharifa Davronova ikkinchi bor Osiyo oʻyinlari chempionligini qoʻlga kiritdi. Uch hatlab sakrash dasturida qatnashgan 19 yoshli sportchi 14.35 metr natija bilan oltin medalga ega chiqdi.

Yettikurash bahslarida qatnashgan Oʻgʻiloy Norboyeva, 100 metr masofaga yugurishda ayollar oʻrtasidagi bahslarda Laylo Allaberganova, erkaklar oʻrtasidagi bahslarda Sulton Gʻofurjonov, disk uloqtirishda Azizbek Nurullayev medallardan quruq qolishgan.

Qilichbozlik

Qilichbozlik bahslarida esa dramatik holat kuzatildi: chorakfinalda Oʻzbekistonning ikki vakili, 2023-yilgi Osiyo oʻyinlarida sablya boʻyicha jamoaviy musobaqada birgalikda chempion boʻlgan Zaynab Dayibekova va Gulistan Perdebayeva toʻqnash keldi. Shiddatli kechgan qarama-qarshilikda Dayibekova kichik ustunlik bilan gʻolib chiqib (15:14), yurishini davom ettirdi va finalgacha yetib bordi. Ammo oltin uchun bahsda ikki karra jahon chempioni, yaponiyalik Misaki Emuraga kichik farq bilan (14:15) yutqazib, kumush bilan kifoyalandi.

Shu tariqa, kun davomida jami 16 ta medal (5 ta oltin, 8 ta kumush va 3 ta bronza) qoʻlga kiritildi, jamoa umumiy reytingda 14-oʻrindan 5-oʻringacha yuqoriladi.