DW xabariga koʻra, Prokudin bu haqda 29-sentabr kuni Telegram-kanalida maʼlum qilgan.
Uning aytishicha, qaytarilganlar orasida Rossiya harbiylari harbiy hisobga turishga majburlagan 16 yoshli oʻsmir ham bor. Shuningdek, xavf-xatarlarga qaramay, ukrain taʼlimini olishga intilgan 17 yoshli qiz ham Ukraina nazoratidagi hududga olib chiqilgan.
Bolalar Ukraina prezidenti Volodimir Zelenskiyning Bring Kids Back UA tashabbusi doirasida, Save Ukraine xayriya tashkiloti koʻmagida qaytarilgan.
Prokudinning maʼlum qilishicha, 2026-yil boshidan buyon Xerson viloyatining bosib olingan hududlaridan jami 204 bola Ukraina nazoratidagi hududga olib chiqilgan.
Ukraina rasmiylari maʼlumotiga koʻra, aprel oyi oxiri holatida ukrain bolalarini Rossiyaga deportatsiya qilish yoki majburan koʻchirish bilan bogʻliq 20 570 dan ortiq holat tasdiqlangan.
Oʻsha paytgacha 2126 bolani qaytarishga muvaffaq boʻlingan. Bu raqamga Rossiyaga majburan olib ketilganlar, vaqtincha bosib olingan hududlar ichida koʻchirilganlar, shuningdek, boshqa joyga koʻchirilmagan, ammo Rossiyaning «qayta tarbiyalash» amaliyotiga duchor boʻlgan bolalar ham kiritilgan.
DW qayd etishicha, BMTning mustaqil xalqaro komissiyasi ukrain bolalarining noqonuniy deportatsiya qilinishi va ularning Rossiyada uzoq muddat qolishi uchun sharoit yaratilishini insoniyatga qarshi jinoyatlar deb baholagan.
2023-yil martida Haagadagi Xalqaro jinoyat sudi Ukraina bosib olingan hududlaridan bolalarni noqonuniy deportatsiya qilish va koʻchirish bilan bogʻliq harbiy jinoyatlarda gumon qilib, Rossiya prezidenti Vladimir Putinni hibsga olishga order bergan. Rossiya prezidenti huzuridagi bolalar huquqlari boʻyicha vakil Mariya Lvova-Belovaga nisbatan ham shunday order chiqarilgan.
28-sentabr kuni Yevropa Ittifoqi ukrain bolalarining Rossiyaga noqonuniy deportatsiya qilinishi munosabati bilan 10 jismoniy va 17 yuridik shaxsga sanksiya joriy etgan. Cheklovlar bolalarni majburan koʻchirish va assimilyatsiya qilish, jumladan, mafkuraviy taʼsir oʻtkazish hamda harbiylashtirishga masʼul deb koʻrsatilgan shaxs va tashkilotlarga qaratilgan.
