Issiqxonalarga berilgan imtiyozlar va isitish mavsumida ehtiyojmand aholiga yordam rejasi - mahalliy dayjest

Yordam Ijtimoiy reyestrga kiritilgan oilalarga beriladi. Shuningdek, reyestrga kirmagan, lekin «mahalla yettiligi» xulosasi va idoralar axborot tizimlaridagi maʼlumotlar asosida mezonga mos keladigan, oiladagi jon boshiga daromadi minimal isteʼmol xarajatlarining (MIX) 2 baravaridan oshmaydigan oilalar ham qamrab olinadi. Yolgʻiz keksalar va nogironligi boʻlgan shaxslar reyestridagi fuqarolar hamda yetim va ota-ona qaramogʻidan mahrum boʻlgan bolalar yashayotgan oilalar ham yordam oladi.

Issiqxona xoʻjaliklariga soliq imtiyozlari berildi

Prezident issiqxona xoʻjaliklarini rivojlantirishga oid qarorni imzoladi. Unga koʻra, issiqxona xoʻjaliklariga quyidagi imtiyozlar va subsidiyalar nazarda tutildi:

- qishloq xoʻjaligi tovar ishlab chiqaruvchilariga qoʻshilgan qiymat soligʻi stavkasi nol foiz etib belgilandi;

- qishloq xoʻjaligi tovar ishlab chiqaruvchilari va baliq xoʻjaligi korxonalari uchun oʻzi ishlab chiqargan mahsulotni realizatsiya qilishdan olingan foyda boʻyicha foyda soligʻi stavkasi nol foiz etib belgilandi;

- issiqxona faoliyatidan olgan daromadlari joriy hisobot (soliq) davri yakunlari boʻyicha jami daromadining kamida 60 foizini tashkil etgan issiqxona xoʻjaliklari uchun ijtimoiy soliq stavkasi 2026-yil 1-yanvardan 2029-yil 1-yanvargacha 1 foiz etib belgilandi.

2027-yil 1-yanvardan 2030-yil 1-yanvargacha issiqxona faoliyatidan daromadining kamida 60 foizini tashkil etgan tadbirkorlik subyektlariga yuridik shaxslardan olinadigan yer soligʻi va mol-mulkka solinadigan soliq stavkalari 50 foizga kamaytiriladi.

1-noyabrdan xalqaro kuryerlik joʻnatmalari uchun bojxona yigʻimi kamayadi

2026-yil 1-noyabrdan xalqaro kuryerlik joʻnatmalarini bojxona rasmiylashtiruvidan oʻtkazganlik uchun amaldagi yigʻim stavkasi 20 foizga pasaytiriladi. Bu chora prezidentning «Transport-logistika tizimini rivojlantirishga doir qoʻshimcha chora-tadbirlar toʻgʻrisida»gi qarorida belgilandi.

Qarorga muvofiq, shuningdek, 2026–2030-yillarda transport-logistika markazlarining yillik quvvatini kamida 40 million tonnaga yetkazish maqsad qilingan. Transport va logistika xizmatlari eksportini 3,5 milliard dollarga, Oʻzbekiston hududi orqali tranzit yuk tashish hajmini esa 18,5 million tonnaga yetkazish rejalashtirilgan.

Barcha talablarga javob beradigan xalqaro quruqlik portlari soni 24 tadan 30 taga koʻpaytiriladi. Davlat chegarasidan oʻtkazish punktlarining yuk tashish qobiliyati hamda logistika markazlarida konteynerlarga ishlov berish quvvati ikki barobar oshiriladi.

Qashqadaryoda sel avtomobilni oqizib ketishi oqibatida bir kishi halok boʻldi

Qashqadaryo viloyati Dehqonobod tumanining togʻli hududlarida yuz bergan sel oqibatida bir kishi halok boʻldi, deb xabar berdi viloyat FVB.

Maʼlum qilinishicha, 13-oktabr kuni qisqa muddatli kuchli yomgʻir sababli tumanning Qoʻngʻirot mahallasi Shakarbuloq qishlogʻi hududidan sel oqib oʻtgan.

Kuchli sel oqimi Damas avtomobili va uning ichida boʻlgan yoʻlovchini oqizib ketgan. Haydovchi avtomobildan tushishga ulgurgan va tirik qolgan.

Olib borilgan qidiruv-qutqaruv ishlari davomida yoʻlovchining jasadi topilgan.