12:59 / 24.05.2021
19104
Toshkent metrosida yana poyezd to‘xtab qoldi
Foto: Kun.uz / arxiv

Toshkent metrosida yana poyezd to‘xtab qoldi. «Toshkent metropoliteni» UK holat yuzasidan rasmiy izoh berdi.

Joriy yil 24 may kuni ertalab soat 08:52da 4-sonli yo‘nalish bo‘ylab harakatlanayotgan poyezd texnik sabablarga ko‘ra «Hamid Olimjon» bekatida to‘xtab qolgan.

«Bu voqea haydovchi tomonidan poyezd nosozligi aniqlanishi munosabati bilan sodir bo‘ldi», deyiladi «Toshkent metropoliteni» xabarida.

Qayd etilishicha, yo‘lovchilar vagonlardan tushirilgan va poyezd zaxiraga, «Paxtakor» stansiyasining berk qismiga jo‘natilgan.

«16-sonli yo‘nalish bo‘yicha orqadan kelayotgan poyezd yo‘lovchilarni olib, jadvalga muvofiq harakatlanishni davom ettirdi. Keltirilgan noqulayliklar uchun uzr so‘raymiz», deyiladi rasmiy izohda.

Toshkent metrosida so‘nggi oylarda ko‘plab ko‘ngilsiz hodisalar kuzatildi.

18 mart kuni «Olmazor» (Chilonzor yo‘li) va «Bekat-1» (Sergeli yo‘li) orasidagi tunnelda ikki poyezd to‘qnashgandi.

7 aprel kuni Toshkent metrosida ikki poyezd to‘qnashgani haqida xabar tarqaldi. Rasmiy izohda texnik sabablarga ko‘ra «G‘ofur G‘ulom» bekatida yo‘lovchilar poyezddan tushirilib, zaxiraga kelgan navbatdagi poyezdga o‘tkazib yuborilgani, yo‘lovchilar tushirilgan poyezd boshqa poyezd yordamida shatakka olinib, «Beruniy» bekatiga olib kelingani ma'lum qilindi. 

8 aprel kuni Sergeli yerusti metrosida poyezd yarim yo‘lda to‘xtab qoldi. Yo‘lovchilar temir yo‘l bo‘ylab piyoda yurishga majbur bo‘ldi.

9 aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. 

28 aprel kuni tunnelda to‘xtab qolgan poyezd haqidagi video tarqaldi, unda yo‘lovchilar relslar orqali harakatlanib, bekatga yetib olgani tasvirlangan.

7 may kuni soat 21:10 dan 22:00 gacha Toshkent metropoliteni Halqa yo‘lining 7-bekatida elektr energiyasi o‘chib qolgandi. Metrodagi nosozlik tufayli shahar jamoat transportida yuqori darajadagi tirbandliklar yuzaga keldi. «Chilonzor» yo‘lida harakat to‘xtab qolgani tufayli bekatlarda to‘planib qolgan yo‘lovchilar tashqariga chiqishga majbur bo‘lishgan.

13 may kuni esa Toshkent metropoliteni «Amir Temur xiyoboni» bekatida barcha yo‘lovchilar tushirib yuborildi, ijtimoiy tarmoqlarda voqea aks etgan videolar tarqaldi. «O‘zbekiston temir yo‘llari» kompaniyasining holat yuzasidan bergan izohida aytilishicha, shu kuni Chilonzor yo‘nalishida texnik-profilaktika ishlari olib borilishi munosabati bilan soat 10:30 dan 11:00 gacha poyezdlar aylanmasi «Amir Temur xiyoboni» bekatiga amalga oshirilgandi.

Top