Бойсундаги конда меҳнат шароитлари ва хавфсизлик қоидаларига амал қилингани текширилмоқда

Сурхондарё вилояти Бойсун туманидаги “Мустақилликнинг 25 йиллиги” газ конида 17 сентябр куни яна водород сулфид гази чиқиши билан боғлиқ аварияда 4 киши ҳалок бўлди, 11 киши жабрланди.

Kun.uz Тоғ-кон саноати ва геология вазирлиги ҳузуридаги Тоғ-кон саноати ва геология соҳасини назорат қилиш инспекцияси билан боғланиб, Бойсунда юз берган ҳодиса бўйича инспекция томонидан нималар қилинаётганига қизиқди.

Маълум қилинишича, ҳодисани ўрганиш бўйича Энергетика вазирлиги, Фавқулодда вазиятлар вазирлиги, Тоғ-кон саноати ва геология соҳасини назорат қилиш инспекцияси ҳамда тегишли идоралар билан биргаликда ишчи гуруҳ тузилган.

“Тоғ-кон саноати ва геология соҳасини назорат қилиш инспекцияси томонидан 2024 йил 19 сентябрда қабул қилинган буйруқ билан ушбу гуруҳий бахтсиз ҳодиса юзасидан махсус текширув ўтказилмоқда. Текширув якунига етганидан сўнг барча ҳужжатлар (материаллар) умумлаштирилади ва тегишли ҳуқуқни муҳофаза қилувчи органга иш очиш учун тақдим этилади.

Меҳнат шароитлари ва хавфсизлик қоидаларига амал қилингани бўйича ҳамда ҳолатни ўрганиш юзасидан амалга оширилган ишлар натижаси бўйича маълумотлар текширув якунлангандан сўнг тақдим этилишини маълум қиламиз”, – дейилади инспекция ахборотида.

Маълумот учун, ушбу назорат органининг вазифалари қаторига қуйидагилар киради:

• ер қаърини геологик ўрганишда ундан фойдаланиш ва муҳофаза қилиш, фойдали қазилмаларни (шу жумладан, ер ости сувларини) қазиб олиш, минерал хомашёни қайта ишлашда ер қаъридан фойдаланувчилар томонидан қонунчилик ва техник жиҳатдан тартибга солиш соҳасидаги норматив ҳужжатлар талабларига ҳамда ер қаъридан фойдаланиш шартларига юридик ва жисмоний шахслар томонидан риоя этилиши устидан давлат назоратини амалга ошириш;
• Тоғ-кон саноати ва геология вазирлиги тизимидаги хавфли ишлаб чиқариш объектларида ҳамда кончилик, портлатиш ишлари, портловчи материалларнинг айланмаси ва металлургия йўналишлари саноат хавфсизлиги соҳаларида қонунчилик ва техник жиҳатдан тартибга солиш соҳасидаги норматив ҳужжатлар талабларига юридик ва жисмоний шахслар томонидан риоя этилиши устидан давлат назоратини амалга ошириш ва бошқалар.

Аввалроқ журналистлар саволларига жавоб берган Бош прокуратура бошқарма бошлиғи Ўктам Ўтаев 17 сентябр кунги аварияда ишчиларнинг ҳалок бўлиши ва жабрланиши бўйича терговга қадар текширув ўтказилаётганини айтганди. “Натижаси бўйича маълумот берилади”, деганди Бош прокуратура масъули.