Наманганда радарлар машмашаси: ким ҳақ?

Наманган шаҳри ҳокими Анвар Отахўжаев ҳамда Наманган вилояти ИИБ ЙҲХБ бошлиғи Мансур Газиев ўртасида ноқонуний радарлар масаласида “хатлар жанги” бўлиб ўтди. Ҳоким шаҳар ҳудудида белгиланган талабларга зид равишда ўрнатилган фоторадарларни олиб ташлашни сўраган бўлса, подполковник унга жавобан ҳокимлик тасарруфидаги хизмат машиналари содир этган қоидабузарликлар бўйича қарздорликларни тўлаб қўйишни сўради.

{Yii::t(}

Ўтказиб юбориш 6s

Ўтказиб юбориш

“Фуқароларга зарар келтирмоқда”

Наманган шаҳар ҳокими Анвар Отахўжаев 2025 йил 12 апрел куни Наманган вилояти ИИБ ЙҲХБ бошлиғи Мансур Газиевга расмий хат билан мурожаат қилди.

Хатда келтирилишича, йўл ҳаракати хавфсизлигини таъминлаш мақсадида ўрнатилган камераларнинг “жарима ёзиши” норозилик кайфияти ортишига сабаб бўлмоқда.

“Жамоатчилик, ёшлар томонидан аҳоли вакиллари билан ўтказилган учрашувлар ва муҳокама йиғилишларида, йўл ҳаракати хавфсизлигини таъминлаш мақсадида ўрнатилган автомобил йўлларида йўл ҳаракати қоидалари бузилганини махсус автоматлаштирилган фото ва видео қайд этиш дастурий-техник воситалари томонидан жарималарнинг қўлланишидан норозилик кайфиятлар ортиб бориши, айниқса ижтимоий тармоқларда мамлакатда олиб борилаётган бошқарувга нисбатан салбий фикрлар билдирилишига сабаб бўлмоқда.

Шунингдек, бино-иншоотларнинг том қисмлари, шаҳар ва туман ободонлаштириш бошқармалари тасарруфидаги ёритиш таянчларига белгиланган меъёрларга зид равишда ўрнатилган фоторадарлар томонидан жарималарнинг қўлланиши оқибатида Наманган шаҳри фуқароларига моддий ва маънавий зарар келтирмоқда”, дейилади хатда.

Ҳоким хатида Наманган шаҳри, Давлатобод ҳамда Янги Наманган туманларида Вазирлар Маҳкамаси қарорига зид равишда ўрнатилган камераларни КААТ тизимидан ўчириш ҳамда улар томонидан қайд этилган қоидабузарликларга жарималар қўллаш ишларини тўхтатиш сўралган.

Ҳокимликнинг қоидабузар машиналари

Орадан кўп ўтмай, 2025 йилнинг 22 апрел куни Наманган вилояти ИИБ ЙҲХБ бошлиғи Мансур Газиев Наманган шаҳар ҳокими Анвар Отахўжаевнинг ноқонуний ўрнатилган радарларни олиб ташлаш ҳақидаги хатига жавоб қайтарди. Подполковник жавоб хатида ҳокимлик хизмат машиналари кўплаб қоидабузарлик содир этаётганини билдирган.

Жавоб хатида президент ва Вазирлар Маҳкамасининг тегишли қарорларига асосан 17 та чорраҳага ҳамда 10 та тўғри йўл участкасига йўл ҳаракати қоидалари бузилишини қайд этувчи махсус автоматлаштирилган фото ва видео қайд этиш дастурий-техник қурилмалари ўрнатилгани қайд этилган.

“Қурилмалар қоидабузар ҳайдовчиларга нисбатан чора кўриш ҳамда автомобил йўлларида тартибли ҳаракатни таъминлаш орқали инсон хавфсизлигини ишончли ҳимоя қилиш ва ўлим ҳолатларини кескин камайтиришга хизмат қилмоқда.

Масалан, Наманган шаҳри, Давлатобод ҳамда Янги Наманган туманлари ҳудудидаги қурилмалар айнан йўл-транспорт ҳодисалари ўчоқлари ҳисобланган жойларга ўрнатилган бўлиб, бу йўналишларда 2024 йилда пиёдалар билан боғлиқ 156 та ЙТҲ содир этилган. Шундан 13 таси ўлим билан, 143 таси эса тан жароҳат билан якунланган. Оғир оқибатларга олиб келган ЙТҲларнинг 70 фоизи ҳайдовчиларнинг тезликни меъёридан оширганликлари оқибатида юзага келган. Жорий йилда эса тезликни қайд қилиш қурилмалари назорати сабабли мазкур йўналишларда ўлим билан якунланган ЙТҲлар содир этилмади”, дейилади бошқарма хатида.

Шунингдек, вилоят ЙҲХБ Наманган шаҳар ҳокимлиги тасарруфидаги 50 020 DAV давлат рақам белгили Captiva машинаси 2024 йил ва жорий йилда жами 47 та қоидабузарлик содир этганини, 11 та ҳолатда 8 млн 170 минг сўм сўм муддати ўтган тўланмаган жарималар борлигини маълум қилган.

Бундан ташқари, ҳокимликнинг бошқа транспорт воситалари томонидан жами 41 та қоидабузарлик бўйича 18 млн 750 минг сўм, Давлатобод ва Янги Наманган туманлари ҳокимликлари тасарруфидаги транспорт воситалари томонидан жами 46 та қоидабузарлик бўйича 16 млн 307 000 сўм миқдорда муддати ўтган тўланмаган жарималар мавжуд экани билдирилган.

Вилоят ЙҲХБ бошлиғи ҳокимдан Наманган шаҳар, Давлатобод ва Янги Наманган туманлари ҳокимликлари тасарруфидаги машиналар томонидан содир этилаётган сурункали қоидабузарликларни танқидий муҳокама қилишини ҳамда муддати ўтган жарималарни ундиришда амалий ёрдам кўрсатишни сўраган.

“Тўланмаган жарима ноқонуний радарлардан келган”

Наманган шаҳар ҳокимлиги матбуот хизмати раҳбари Рахмонжон Мамадалиевнинг Kun.uz’га билдиришича, 50 020 DAV давлат рақам белгили Captiva хизмат машинаси сифатида шаҳар ҳокими Анвар Отахўжаевга бириктирилган.

“Ҳокимлик машиналарининг қарздорлиги белгиланган талабларга зид равишда ўрнатилган радарлардан келган. Биз судга бермасдан хат қилгандик. Қолганлари бўйича қарздорлик тўланган”, дейди ҳокимлик матбуот хизмати раҳбари.

Рахмонжон Мамадалиевнинг қўшимча қилишича, ҳокимлик ўз хатида белгиланган талабларга зид равишда симёғоч, ёритиш ускуналари ва биноларга ўрнатилган радарларни олиб ташлашни сўраган.

Радарлар қандай ўрнатилиши керак?

Вазирлар Маҳкамасининг 2021 йил 21 апрелдаги қарори билан “Тадбиркорлик субъектлари томонидан автомобил йўлларида йўл ҳаракати қоидалари бузилганлигини махсус автоматлаштирилган фото ва видео қайд этиш дастурий-техник воситаларини ўрнатиш ва эксплуатация қилиш тартиби тўғрисида”ги Низом тасдиқланган. 

Мазкур Низомда тадбиркорлик субъектлари томонидан автомобил йўлларида йўл ҳаракати қоидалари бузилганлигини махсус автоматлаштирилган фото ва видео қайд этиш дастурий-техник воситаларини ўрнатиш ва эксплуатация қилиш тартиби белгилаб берилган.

Техник талабларга кўра, тизимлар 6 метрдан кам бўлмаган баландликда металл устунга ўрнатилиши талаб этилади. Яъни, бетон симёғочга, ёриткичга, биноларга ўрнатилган радарлар белгиланган техник талабларга мос эмас.