Боксчи Асадхўжа Мўйдинхўжаев Тошкент марказида Tahoe’да 110 тезликда ҳаракатланди

Тошкент шаҳрида бокс бўйича Париж-2024 Олимпия ўйинлари чемпиони Асадхўжа Мўйдинхўжаев йўл ҳаракати қоидаларини бузиб, юқори тезликда ҳаракатланди. У буни видеога олдириб, Instagram саҳифасига жойлаштирган.

Кейинроқ видео ўчириб юборилди.

Мўйдинхўжаев видеосида у шаҳар марказида 110 км/соат тезликда ҳаракатланганини кўриш мумкин. Шаҳарда тезлик чеклови эса 60 км/соатни ташкил қилади.

МЖтКга кўра, спортчи белгиланган тезликдан 50 км/соат тезроқ юргани учун 3 млн 60 минг сўм жарима тўлаши керак бўлади.

Ижтимоий тармоқдаги реакция

Бу ҳолат ижтимоий тармоқ фаоллари ва фойдаланувчилар томонидан эътирозга учради. 

Ҳуқуқшунос ва блогер Хушнуд Худойбердиев киноя билан у Олимпиада чемпионлиги учун олган мукофот пули «яна 823 марта шундай қоидабузарлик қилишга етиши»ни айтади.

«Ҳаммасига ўзимиз айбдормиз. Қоидабузарликларни мақтаймиз, буни кўз-кўз қилганларни қўллаб-қувватлаймиз. Бунақа қоидабузарларни «крутой» деймиз, қоидага амал қиладиганларни «лох» деймиз. Қоидабузарларга қарши курашганларни «казёл» деймиз.

Шу сабабли ҳар куни кўчаларимизда 10 га яқин инсон автоҳалокатдан вафот этаверади. Кимлардир отасидан, кимлардир онасидан, кимлардир фарзандидан айрилиб қолаверади. Минг афсус...

Қоидабузарлигини интернетга мақтаниб жойлайдиганларнинг ҳайдовчилик гувоҳномасини бекор қилиш ҳақидаги қонун қачон қабул қилинади? Жарима баллари тўғрисидаги қонунни қачон охирига етишади? Ўзи умуман қачон тартибга солинади бунақа ҳолатлар? Қачон қатъий жавобгарлик белгиланган даврларга келамиз? Нега ухлаяпмиз? Пулини тўлаб, истаганини қилса бўладиган қонунлар шармандалик эмасми?» дея саволлар қўйган у.

Блогер Шаҳноза Соатова ушбу боксчига қатъийроқ чора кўришга, қоидабузарлик содир этилган автомобилни олиб қўйишга чақирган.

«Бокс бўйича Олимпиада чемпиони Асадхўжа Мўйдинхўжаев «Президент совғаси» деб ёзилган автомобилда Тошкент кўчаларида соатига 110 км тезликда ҳаракатланибди. Ва буни чиройли мобилографик композиция қилиб тармоққа жойлабди (яъни тасодифан видеога тушиб қолмаган).

Биз буларни соғлом турмуш тарзи ва спортча иродаю интизомни тарғиб қилади десак, қоидабузарликни роса жозибали тарғиб қилишяпти-ку.

Ёшлар бир куни шунақа совғаларда қоида бузиш учун спорт билан шуғулланганидан шуғулланмагани яхши. Бу тўғри ибрат эмас, бу давлат ва жамиятнинг эътибори ҳамда миннатдорчилигини суиистеъмол қилишдир. Ёш болалар ўляпти шунақа ўпкасини босолмаганлар касрига. 

Олимпиада чемпионимиз эса қонунан жазо олсин. Нафақат тезликни оширгани учун, қоидабузарликни тарғиб қилгани учун ҳам. «Президент совғаси» эса олиб қўйилсин, эртага шу машинада бир балони бошлаб, яхши нарсани ёмон доғга айлантирмасидан», дея ёзади у.

Тошкент шаҳар ИИББ ЙҲХБ ахборот хизмати раҳбари Қаҳрамон Худойбергановнинг «Дарё»га билдиришича, чемпион эгалигидаги автомобил шаҳар бўйлаб қидирувга берилган. 

«Қонун ҳамма учун баробар, ҳар бир ҳуқуқбузарлик учун ҳам жавобгарлик муқаррар. Тез орада автомобил топилиб, чора кўрилади ва бу ҳақда жамоатчиликка расмий каналларимиз орқали маълумот берамиз», — деган масъул.

Эслатиб ўтамиз, Асадхўжа Мўйдинхўжаев 71 килограммгача бўлган вазн тоифасида бокс бўйича Париж Олимпиадасида олтин медал олган. Бу учун унга 200 минг АҚШ доллари, Tahoe автомобили ва икки қаватли коттеж совға қилинган.

Ўзбекистон йўлларидаги вазият

Сенатнинг Мудофаа ва хавфсизлик масалалари қўмитасининг июн ойида ўтказилган мажлисида маълум қилинишича, Ўзбекистонда жорий йилнинг дастлабки 5 ойи давомида йўл-транспорт ҳодисалари оқибатида мактаб ўқувчиси бўлган 65 нафар бола ҳалок бўлган, 294 нафари жароҳатланган.

Мактаблар ва олийгоҳларда янги ўқув йили бошланиши билан болалар ўлими билан боғлиқ ҳолатлар рўй бера бошлади.

19 сентябр куни Тошкент шаҳри Сергели туманида BYD кроссовери катта тезликда ҳаракатланиб кетаётганда автобусдан тушиб, йўлни кесиб ўтаётган 9 ёшли ўқувчи қизни уриб юборган. У касалхонага олиб кетилаётганда вафот этди.

20 сентябр куни эса Бухорода ҳоким ёрдамчисининг машинаси уриб юборган ўқувчи вафот этган, мансабдор тезликни оширгани ҳақида хабарлар тарқалган.

18 сентябр куни ҳам Тошкент шаҳри Шайхонтоҳур туманида Gentra ҳайдовчиси катта тезликда ҳаракатланиб келиб, пиёдалар ўтиш жойида 19 ёшли қизни уриб юборди ва уни ўлдирди. Марҳуманинг отаси ва гувоҳларга кўра, ҳайдовчи унинг машинаси «мурда ташувчи эмаслигини» айтиб, қизни шифохонага элтишдан бош тортган.